Thursday, June 28, 2012

သရဲကား ကြိုက်သူ


by Aung Kyaw Moe on Wednesday, June 27, 2012 at 8:32am 

မြဝဿန်ရေ....
ညနေက လက်ဖက်ရည်ဆိုင်ထိုင်ရင်း ထောင် အကြောင်းပြောဖြစ်တယ်။ အဓိက ကတော့ ထောင်ထဲက ထွက်လာတဲ့ လူတွေထဲ က အများစု ထောင်ထဲ ပြန်မဝင်ချင်တော့တဲ့ အကြောင်းဆိုပါတော့။ တကယ်တမ်း စဉ်းစားကြည့်တော့ လဲ ထောင်ထဲ မှာ နေရတယ် ဆိုတာ ဘဝ က လုံးဝ ရပ်တန့် သွားတာမျိုးမဟုတ်လား။ စားချင်တာ စားမရ ၊ သွားချင်တာ သွားမရတာ ဆိုတဲ့ ကိစ္စတွေ ထားလိုက်ဦး အချိန်တော်တော် များများ ကိုယ့်စိတ်ကိုယ့်ကို နဲ့ လွတ်လွတ်လပ်လပ်နေလို့  မရတာကို က ထောင် ဆိုတာ နေဖို့ မကောင်းတော့ဘူး။ သူ့ စည်းသူ့ ကမ်းအရ ညဘက်မထွက်ရတာ တို့  ၊ အချိန်နဲ့ ဆင်းရတာတို့  ဆိုတာ တကယ်ကို အသေးအဖွဲ  ပါ။ ကိုယ်နေတဲ့ တိုက်ခန်းရှေ့လာပြီး မသင်္ကာမှု အပြည့် နဲ့  လာလာကြည့်တတ် တဲ့ အခါတွေ ဆို ဘယ်လောက်များ စိတ်ပျက်ဖို့ ကောင်းမလဲ စဉ်းစားကြည့်ပေါ့။

ထောင်မကျခင် အချိန်တွေ ၊ အန္တရယ်နဲ့  ထိပ်တိုက်မတွေ့ရသေးခင် အချိန်တွေ မှာ လူရဲကြီးတွေ လို နေတတ်ပြီး ထောင်ထဲ ရောက်လာတဲ့ အခါမှ အတ္တတွေ၊ တစ်ကိုယ်ကောင်းစိတ်တွေ အထင်းသားပေါ်လာ တဲ့ လူတွေ ရှိတယ်။ ထောင် အာဏာပိုင်တွေ ကို ဆရာခေါ်ရင်း ၊ ကပ်ဖားရပ်ဖား လုပ်ရင်း၊ ကိုယ်တစ်ဦးတစ်ယောက်စာ နေသာရေး အတွက် ကိုယ့် သိက္ခာ ၊ ကိုယ့်မာန ကို ချနင်းရဲ တဲ့ လူတွေ ပေါ့။

အုပ်စု အသိုင်းအဝိုင်း တောင့်တင်းခြင်း ကို အသုံး ပြုပြီး ထောင်ထဲမှာ နေထိုင်သူအချင်းချင်း နိုင်ကျင့်တတ်တဲ့ သူတွေ ရှိတယ်။  ထောင်ဝင်စာ အစားအသောက် ခွဲပေးတဲ့ အခါ ကွက်ချန်ထားခဲ့တာတို့  ၊ ဂျာနယ်ပေးမဖတ်တာတို့  ၊ စာအုပ်ငှား မဖတ်တာတို့  ပေါ့။

ထောင်တွင်း ဒုက္ခတွေ ကို မခံနိုင်ဘဲ အကျိုးအကြောင်းမဲ့ လွတ်မြောက်လိုမှုအားကဲပြီးတော့ နိုင်ငံရေးအကျဉ်းသားချင်းရော ၊ ထောင်အာဏာ ပိုင်တွေ နဲ့ ပါ အဆင်မပြေ တဲ့ -င်မနိုင်ပဲ ပဲကြီးဟင်း စားတဲ့ ဆရာသမားတွေ ရှိတယ်။ စိတ်အချဉ်ပေါက်ပြီး ဘယ်သူ့မှ အကောင်းမမြင်နိုင်တော့ ပဲ ဆန့် ကျင်ဘက်တွေ ပဲ တွေးပြီး ပြဿနာတွေ တစ်ခုပြီးတစ်ခု တတ်နေတတ်တဲ့ လူတွေပေါ့။

နောက်ပြီး ဝါဒ သူငယ်နာမစင်တဲ့ လူတွေလဲ ရှိသေးတယ်။ ကိုယ့် ရှိတဲ့ စားစရာ၊ အသုံးအဆောင် ၊ ငွေကြေးကို ကိုယ်နဲ့ ထမင်း တူတူ စား တဲ့ လူတွေ နဲ့  အညီအမျှခွဲ သုံးတတ်တဲ့ သူတွေ၊ ပုဂ္ဂိုလ်ရေး အစွဲကင်းပြီး ဝေဖန်စရာ တွေကို သိပ်ဂရုမစိုက်ပဲ ဝေဖန်တတ်တဲ့သူတွေ ကို လက်ဝဲ၊ ကွန်မြူနစ်၊ ဘာညာ ဆိုပြီး စွတ်ဆွဲပြီး အနီကြောက်ဖိုဘီးယား သမားတွေ ပေါ့။


မြဝဿန်ရေ...
တကယ်တမ်းထောင်ထဲ မှာ အဲလို တစ်စုံတစ်ရာ ပြဿနာရှိတဲ့ လူတွေ ချည်းပဲတော့ မဟုတ်ဘူး။ အင်မတန် ရပ်ခံချက်ခိုင်မာပြီး ဒူးမထောက် လက်မမြောက် ပုဂ္ဂိုလ်ကြီး ၊ ပုဂ္ဂိုလ်လေးတွေ လဲ အများကြီး ရှိနေတာပါ။ တစ်ဦးပေါ်တစ်ဦး ရဲဘော်ရဲဘက်စိတ်နဲ့  မျှဝေ ခံစား မှု ဆိုတာလဲ ငါ အနေ နဲ့  ဘယ်လို မှ ပြောမပြတတ်ဘူး။ ငါ တို့  ထောင်အုပ်ရိုး အပြင်ဘက်မှာ တွေ့ဖို့ခက်ခဲတဲ့ တစ်ဦးနဲ့ တစ်ဦး အနစ်နာခံမှု ဖေးမမှုတွေ လဲ ရှိနေတာပါပဲ ။ တကယ်တော့ ထောင်ဆိုတာ ပန်းပဲဖိုကြီး ဆိုတဲ့ စကားလုံး အဟောင်းကြီးကိုပဲ ငါတော့ ကိုးကားရလိမ့်ဦးမယ်။ ဓါးလို့ ထင်ရတဲ့ အရာတွေကို မီးပြင်းတိုက်ထားတဲ့ ပန်းပဲဖိုကြီးထဲ ထဲ့လိုက်တဲ့ အခါ တကယ့် သံအစစ်နဲ့  လုပ်ထား တဲ့ ဓါးတွေကတော့ ထုသားပေးသား ကျ ပြန်ထွက်လာမှာပေါ့။ သစ်သားဓါးတွေ၊ ခဲသားဓါးတွေ ကတော့ ဘယ်လိုမှ အကောင်းအတိုင်း ပြန်ထွက်လာမှ မဟုတ်ဘူး။

ထောင်တွေ ထဲက ထွက်လာပြီး သူတို့  ယုံကြည်ရာအမှန်တရားမှာ မဆုတ်မနစ် ဆက်လုပ်နေတဲ့ လူတွေ (ဟိုး အစဉ်အဆက်ကို ပြောတာပါ။ ငါတို့  ထောင်က ထွက်တဲ့ ခေတ်ကတော့ နိုင်ယှဉ်ချက် အရ RISK အရမ်းနည်းသွားပြီ လို့ ပြောလို့ ရပါ တယ်။ ) ကို ငါ ငယ်ငယ်ကတည်း က တအံ့တသြ ဖြစ်ခဲ့ပါတယ်။ ကိုယ်တိုင် ထောင်ထဲ ရောက်သွားတဲ့ အခါ ပိုပြီး လေးစား အံ့သြ ရပါတယ်။ ဒီလောက် စိတ်၊ ရုပ် ကျဉ်းကျပ်ရတဲ့ နေရာကို နောက်တစ်ကြိမ်ထပ်ရောက်မှာ ဘာလို့ မကြောက်တာပါလိမ့်ဆိုတာ မျိုးပါ။

လက်ရှိ နိုင်ငံရေးအခြေအနေမှာလဲ ဟို တစ်လောက သတင်းတပ်ဖွဲ့က ခေါ်မေးတာမြန်းတာတွေ လုပ်လာတဲ့ အခါ၊ ကိုကျော်ကိုကို တို့  ကို အသင်းအဖွဲ ( ၆) နဲ့  ညှိစွန်းနေတယ်လို့ ခေါ်ပြောတဲ့ အခါ အချိန်မရွေး အဖမ်းခံရနိုင်တယ် ဆို တဲ့ အသိနဲ့  အတူ ကိုယ့်ကိုကို ဆန်း စစ် မိတယ်။ အဲလိုနေရာကြီး ကို ငါ နောက် တစ်ကြိမ်ထပ်သွား နိုင်သေးသလား ၊ သွားရဲ သေးသလား ဆိုတဲ့ မေးခွန်းနဲ့ ပါ။ ရိုးရိုးသားသား ပြောရရင် ထပ်လဲ မသွားရဲ တော့ဘူး၊ ထပ်လဲ အဖမ်းမခံချင်တော့ဘူး ။ သဘောကတော့ ငါ့ ရွေးချယ်ချက်နဲ့  ငါ ဆိုရင်တော့ လုံးဝ ကို မသွားဘူး ။ အန္တရယ်ကင်းပြီး ဘောင်ထဲ က ခွင့်ပြုသလောက်လုပ်ရင် ထောင်မကျနိုင်ဘူး ဆိုတာ ကို နားလည်ပေ မဲ့ လက်ရှိ ငါ တာဝန်ယူထားတဲ့ အလုပ်ကိုလဲ လုပ်သင့်တယ်လို့  ငါယုံတဲ့ အတွက် ဆက်လုပ်မယ်။ 

မြဝဿန်....
ငါတော့ တစ်ခါမှ သရဲကားမကြည့်ဖူးဘူး။ ဘာလို့  လဲ ဆိုတော့ သရဲမကြောက်တတ်လို့  လို့ ပဲပြောရလိမ့်မယ်။ သရဲကားကြည့်တဲ့ လူတွေ ကို ကြည့်တော့အများစု သရဲကြောက်တတ်တဲ့လူတွေ ဖြစ်နေတတ်တယ်။ ကြောက်ကြောက်နဲ့  ကြည့်ရတဲ့ အရသာကို ကြိုက်နေကြတဲ့ လူတွေ ပေါ့။

၁၉၆၂ ကစလို ဒီနေ့အထိ ထောင်အကြိမ်ကြိမ်ကျလိုက် လုပ်သင့်တာလုပ်လိုက် အဖမ်းခံလိုက်ရနဲ့  သူတို့  ဘဝကို ရပ်ခံဖြတ်သန်းနေတဲ့ ပုဂ္ဂိုလ်တွေ ကတော့ ဘယ်လို ယုံကြည်ချက်၊ ခံယူချက်မျိုးနဲ့  ဖြတ်သန်းနေကြတယ်ဆိုတာ ငါ့ အနေနဲ့  မပြောပြတတ်ပါဘူး။

ဝဿန်ရေ....
ငါကိုယ်တိုင်ကခုန ငါတွေး သလိုပဲ သရဲကြောက်တတ်တော့ သူရဲကားကြည့်ရတာ ကို ကြိုက်တတ်တဲ့ လူမျိုးနေပါလိမ့်မယ်။  ငါတို့ နိုင်ငံအတွက် လမ်းကြောင်းမှန် တစ်ခုပေါ်မှာ တည်တည်ငြိမ်ငြိမ်ရပ်တည်နိုင်ပြီလို့  မခံစားမိသေး သမျှ ကြောက်ကြောက် လန့် လန့် နဲ့  သရဲကား ဆက်ကြည့်နေဖြစ် ဦးမယ် ထင်ပါရဲ့။

မိုးထက်နေ

No comments:

Post a Comment

Related Posts Plugin for WordPress, Blogger...