Saturday, January 31, 2015

ကျောင်းသားလှုပ်ရှားမှုနှင့်ပတ်သက်၍ ကျနော့်အမြင်

နိဒါန်း

ကျောင်းသားလှုပ်ရှားမှုများ ဖြစ်ပေါ်လာရခြင်းသည် ကျောင်းသားများ၏ လွတ်လွပ်စွာ စည်းရုံးလှုံဆော် နိုင်ခွင့်၊ ကျောင်းသားသမဂ္ဂများဖွဲ့စည်းတည်ထောင်ခွင့်၊ အစိုးရအမှားများကို ဝေဖန်ထောက်ပြခွင့်၊ လွတ်လပ်စွာ မိမိနှစ်သက်ရာ ဘာသာရပ်များကို သင်ကြားလေ့လာနိုင်ခွင့်၊ ဘဝအာမခံနိုင်သည့် အလုပ်အကိုင်များ ရရှိနိုင်သည့် အခွင့်အလမ်းများ ရရှိခွင့်တို့ နှစ်ပေါင်းများစွာ ကင်းမဲ့နေခဲ့၍ ဖြစ်သည်ဟု ယေဘုယျ သုံးသပ်မိသည်။

ကျနော့်အနေနှင့် ဖေဖော်ဝါရီလ (၁) ရက်နေ့တွင် ကျင်းပမည့် ကျောင်းသားများတောင်းဆိုသည့် (၄) ပွင့်ဆိုင် ဆွေးနွေးပွဲကို ထောက်ခံသည်။ မတူညီသော အမြင်များကို ဆွေးနွေးညှိနှိုင်းရာ၌ အကြမ်းဖက်ခြင်းနည်းလမ်းကို အသုံးမပြုဘဲ ဆွေးနွေးညှိနှိုင်းအဖြေရှာခြင်းသည်သာ အကောင်းဆုံးနည်းဖြစ်ကြောင်း ယုံကြည်သည်။ ဆွေးနွေးညှိနှိုင်းရာတွင် မိမိလိုလားချက်အားလုံးကို တရားသေဆုတ်ကိုင်မထားဘဲ အလျော့အတင်း ပြုလုပ်နိုင်မှသာ အောင်မြင်မည်ဖြစ်ကြောင်းလည်း ယုံကြည်သည်။


ကျောင်းသားများအတွက် အဓိကလိုအပ်ချက် (၂ ) ချက်။
၁။ တစ်နိုင်ငံလုံးရှိ တက္ကသိုလ်၊ ကောလိပ်များအားလုံးကို ဦးဆောင်သည့် ကျောင်းသားခေါင်းဆောင်များဖြင့် ဖွဲ့စည်းထားသည့် ဗဟိုဦးဆောင်ကျောင်းသားသမဂ္ဂကြီး ပေါ်ပေါက်လာရေး။

၂။ ဖောက်ခွဲဖျက်စီးခြင်းခံခဲ့ရသော တကသအဆောက်အအုံကြီး ပြန်လည်တည်ဆောက်ရေးနှင့် တက္ကသိုလ်၊ ကောလိပ်အသီးသီးတွင် ကျောင်းသားသမဂ္ဂရုံးခန်းများ တရားဝင်ဖွင့်ခွင့်ရရှိရေး။

ထိုအချက် (၂) ချက်သည် အထူးအရေးကြီးသည်။ ထို ၂ ချက်မရှိ၍ ကျောင်းသားများ အဆင့်မြင့်ပညာရေးကို သင်ကြားခွင့် မရရှိဘဲ ချို့တဲ့နိမ့်ကျသည့် ပညာရေးစနစ်ဖြင့်သာ သင်ယူနေခဲ့ရသည်။ အဘယ်ကြောင့်ဆိုသော် အရပ်သားပညာရေးမြင့်မားလာမှုသည် မိမိတို့၏အာဏာကို ချိန်းခြောက်မှုတစ်ခုအဖြစ် မြင်ထားသော စစ်ဝါဒီများက အရပ်သားပညာရေးကို စနစ်တကျ နှိမ့်ချထားပြီး စစ်တက္ကသိုလ်များကိုမူ အဆင့်မြင့်ပညာရေးဖြင့် သင်ကြားစေခဲ့ခြင်းကြောင့်ဖြစ်သည်။ ထို့ပြင် စစ်တက္ကသိုလ်နှင့် စစ်နည်းပညာတက္ကသိုလ်များတွင် သင်ထောက်ကူပစ္စည်းများ အပြည့်အစုံ ထားရှိပေးခြင်း၊ တတ်ကျွမ်းသည့် ဆရာကောင်းများနှင့် သင်ကြားစေခြင်းဖြင့် စစ်တက္ကသိုလ်ထွက်များသည် အရပ်သားပညာတတ်ဘွဲ့ရများထက် သာလွန်စေရန် စစ်ဝါဒီများက မျိုးချစ်စိတ်ကင်းမဲ့စွာဖြင့် အမြင်ကျဉ်းမြောင်းစွာ စနစ်တကျ ပြုလုပ်ခဲ့ခြင်းကြောင့်ဖြစ်သည်။

စစ်ဝါဒီများခန့်ထားသော ပညာရေးဗြူရိုကရက်များကလည်း စစ်ဝါဒီတို့အလိုကျ တက္ကသိုလ်ကောလိပ်များကို ထောင်များသဖွယ် ခြံစည်းရိုးအထပ်ထပ်၊ တံခါးဂိတ် အဖြတ်ဖြတ်ဖြင့် ပိတ်ဆို့ထားပြီး ကျောင်းသား လှုပ်ရှားမှုများကို ထိန်းချုပ်ရန်၊ နိုင်ငံရေးမလုပ်ဆောင်နိုင်ရန်တို့သည် သူတို့အတွက် အဆင့်မြင့် ပညာသင်ကြားပေးရေးထက် သူတို့မျက်နှာရရေးသည်သာ ပထမဦးစားပေးအနေနှင့်ရှိနေခဲ့သည်။

ထိုအခြေအနေကို ကျော်လွှားတိုက်ဖျက်ရန် တက္ကသိုလ်ကောလိပ်များအားလုံးမှ ရွေးချယ်လိုက်သည့် ကျောင်းသားခေါင်းဆောင်များဖြင့် ဖွဲ့စည်းထားသော မြန်မာနိုင်ငံလုံးဆိုင်ရာ ကျောင်းသားသမဂ္ဂများ အဖွဲ့ချုပ်ကြီး ပေါ်ပေါက်လာရေးသည် ပထမဦးစားပေးလုပ်ငန်း ဖြစ်သည်ဟု မြင်သည်။ ကျောင်းသားများ အားလုံးကို ကိုယ်စားပြုထားသည့် အဖွဲ့အစည်းရှိလျှင် ထိုအဖွဲ့အစည်းကြီးမှ ကျောင်းသားများအကျိုး၊ တိုင်းပြည်အကျိုးကို ကောင်းမွန်စွာ လုပ်ဆောင်နိုင်သည့် အင်အားကို ရရှိမည်ဖြစ်သည်။

၁။ ထိုသို့ အင်အားရှိသောကျောင်းသားဗဟိုကော်မတီပေါ်ပေါက်လာရန် ကျောင်းသားညီလာခံကြီးကို (၄) ပွင့်ဆိုင် ဆွေးနွေးနေစဉ်အတွင်းတွင်လည်းကောင်း သို့မဟုတ် ဆွေးနွေးမှုထဲတွင် ရန်ကုန်တက္ကသိုလ်၌ ပြည်လုံးကျွတ် ကျောင်းသားညီလာခံကြီးကို ကျင်းပမည်ဖြစ်ကြောင်း ထည့်သွင်းပြောဆိုပါက အလွန်အကျိုး ရှိမည်ဖြစ်သည်။ ထိုကျောင်းသားညီလာခံကြီးမှ တက္ကသိုလ်ကောလိပ်များအားလုံးကို ကိုယ်စားပြုသည့် ကျောင်းသားခေါင်းဆောင်များ ပေါ်ထွက်လာနိုင်မည်ဖြစ်သည်။

၂၊ ကျောင်းသားသမဂ္ဂများတရားဝင်ရှိလာလျှင် ထိုအဖွဲ့အစည်းများနှင့် ဗဟိုသမဂ္ဂတို့အတွက် လုပ်ငန်း လုပ်ဆောင်ရန်၊ စည်းဝေးတိုင်ပင်ရန်တို့အတွက် ဆောက်အအုံများ၊ ရုံးခန်းများ လိုအပ်လာမည်ဖြစ်သည်။ ကျောင်းသားသမဂ္ဂများ တရားဝင်တည်ရှိလာသော်လည်း ရုံးခန်းများ၊ အစည်းအဝေးခန်းမများ မရှိလျှင် လမ်းဘေးသမဂ္ဂများအဆင့်မှ တက်လာနိုင်မည် မဟုတ်ချေ။ ထို့ကြောင့် ကျောင်းသားသမဂ္ဂရုံးခန်းများသည် ကျောင်းဝင်းတွင်း၌သာ ရှိရမည်။ ထို့အတွက် ကျောင်းအုပ်ချုပ်ရေးထံမှ ရပိုင်ခွင့်ကို တောင်းယူနိုင်ရမည်။

ယနေ့ကျောင်းသားများ ကျောင်းသားရေးနှင့် နိုင်ငံရေးကို လွတ်လပ်စွာလုပ်ဆောင်နိုင်ရန် အထက်ပါအချက် ၂ ချက်သည် မဖြစ်မနေရယူရမည့် အချက်များဖြစ်ပြီး လျော့၍မရသော အချက်များဖြစ်သည်။ ထိုအချက် ၂ ချက်ရလျှင် ကျန်လိုလားချက်များသည် မိမိအင်အားကြောင့် ရရှိလာမည်မလွဲဖြစ်သည်။ ထို့ကြောင့် ဦးတည်ချက်မမှားရန် အဓိကနှင့် သာမည ကွဲရန်လို ကြောင်း ကျနော်၏အမြင်ကို တင်ပြလိုက်ပါသည်။

လမ်းဘေးတွင် ဆွေးနွေးကျင်းပနေရသော သမဂ္ဂများဘဝမှ ကျောင်းဝင်းအတွင်း ဂုဏ်သိက္ခာရှိရှိ ဆွေးနွေးလှုပ်ရှားနိုင်ပြီး ပြည်သူများအကျိုး၊ မိမိနိုင်ငံအကျိုးကို ဆထက်တံပိုးထမ်းဆောင်နိုင်သော ကျောင်းသားသမဂ္ဂများပေါ်ထွန်းရေး၊ ကျောင်းသားထုတစ်ရပ်လုံးက ထောက်ခံရွေးချယ်ထားသည့် ကျောင်းသား ခေါင်းဆောင်များ ပေါ်ပေါက်လာရေးနှင့် ကျောင်းသားသမဂ္ဂကြီး ပြန်လည်တည်ဆောက်နိုင်ရေးသို့ ရည်ရွယ်ပါသည်။

လေးစားစွာဖြင့်
ထွန်းအောင်ကျော် (၇၄ မျိုးဆက်)

No comments:

Post a Comment

Related Posts Plugin for WordPress, Blogger...