Monday, February 9, 2015

ဟိတ်ဟန်များပေမယ့် ကျဉ်းထဲကြပ်ထဲက ဦးသိန်းစိန်အစိုးရစစ်တပ်ကြီး


၁။ အခုတလော ပလောင်ပြည်လွတ်မြောက်ရေးတပ်မတော်နဲ့ ဦးသိန်းစိန်အစိုးရတပ်ဖွဲ့တွေကြား တိုက်ပွဲတွေပြင်းထန်နေတာ သတင်းတွေမှာတောက်လျှောက်ကြားနေရတယ်။ စစ်တပ်ဖက်က ထိခိုက်ကျဆုံးတာတွေလည်း အတော်များတာတွေ့ရတယ်။ ထူးခြားတာက ဝေဟင်ပစ်ကူပေးတာ။ ပထမအဆင့် တိုက်ခိုက်ရေးရဟတ်ယာဉ်တွေနဲ့ ပစ်ခတ်မှုကိုလုပ်ခဲ့တယ်ဆိုဘဲ။ အဲဒီဖြစ်စဉ်မှာ ဒေသခံရွာသားတွေပါ ထိခိုက်မှုတွေရှိခဲ့တယ်လို့ သတင်းတွေမှာတက်လာတယ်။ အသင့်ရောက်လာတဲ့ ဂျက်တိုက်လေယာဉ်တွေလည်း ဒုတိယနေ့ရောက်တော့ ဝေဟင်ပစ်ကူပေးရသေးတယ်တဲ့။

၂။ ပျောက်ကြားလှုပ်ရှားစစ်ကြောင်းနဲ့ဖြစ်တဲ့တိုက်ပွဲမှာ ဝေဟင်ပစ်ကူပေးတာကတော့ အတော်အံ့သြမိတယ်။ ပစ်မှတ်အရှင်ကိုထိဖို့ထက် အပြစ်မဲ့ရွာသားတွေကိုထိဖို့က ပိုများတယ်လေ။ ပလောင်ပြည်လွတ်မြောက်ရေးတပ်မတော်ဆိုတာ မိမိကိုယ်ကို ခုခံစစ်နဲ့ပျောက်ကြားစနစ်နဲ့တွဲပြီးကျင့်သုံးနေတဲ့အဖွဲ့ဖြစ်တယ်။ ပျောက်ကြားသဘောသဘာဝအတိုင်း ခံစစ်၊ ထိုးစစ်နှစ်ခုစလုံး တွဲသုံးနေတာဖြစ်တယ်။ ခံစစ်သေသဘောတရားကိုကျင့်သုံးတာမဟုတ်တဲ့ သေနင်္ဂဗျူဟာလို့ဆိုလိုတာပါ။ ဒီလိုကျင့်သုံးတဲ့အဖွဲ့အစည်းကို ဘယ်လိုဝေဟင်ပစ်ကူက ထိရောက်အောင်ချေမှုန်းနိုင်မှာလဲ။ သဘာဝတောတောင်ပထ၀ီအနေအထား အကာအကွယ်တွေကြောင့် ခြောက်လှန့်ရုံလောက်ကလွဲလို့ ဒီထက်ပိုပြီးချေမှုန်းလို့ ဘယ်လိုရနှိုင်ပါ့မလဲ။
၃။ ၂၀၁၀ရွေးကောက်ပွဲပြီးနောက်ပိုင်းတက်လာတဲ့ ဦးသိန်းစိန်အစိုးရနဲ့ ကချင်ပြည်လွတ်မြောက်ရေးအဖွဲ့အကြား နယ်ခြားစောင့်တပ်အဖြစ် အသွင်ပြောင်းရေးနဲ့ပတ်သက်ပြီး ညှိလို့နှိုင်းလို့မရတော့ပဲ စစ်ရေးအရတိုက်ပွဲဖေါ်ဆောင်ဖို့ တာပန်ရေအားလျှပ်စစ်စက်ရုံကိစ္စအကြောင်းပြပြီး အပစ်အခတ်ရပ်စဲထားမှုကို စစ်တပ်က စတင်ချိုးဖေါက်ခဲ့တယ်။ အဲဒီအချိန်ကစပြီး အခုနောက်ဆုံးဖြစ်နေတဲ့ ရှမ်းပြည်မြောက်ပိုင်းနယ်မြေအထိကျယ်ပြန့်လာတဲ့စစ်ပွဲတွေမှာ ဦးသိန်းစိန်အစိုးရစစ်တပ်က အရာရှိ၊ အရာခံ၊ အကြပ်၊ တပ်သားထောင်ပေါင်းများစွာဟာ သေကြေဒဏ်ရာရခဲ့တယ်။ ပြည်ပရန်ကိုတွန်းလှန်ဖို့မဟုတ်ပါပဲ စစ်အသုံးစရိတ်တွေကို အလွန်အမင်းသုံးခဲ့တယ်။ ဝေဟင်ပစ်ကူတွေနဲ့ ထိုးစစ်တွေကိုကျင့်သုံးခဲ့တယ်။ ဒါပေမဲ့ စစ်ပွဲတွေမှာပါဝင်တဲ့ဦးသိန်းစိန်တို့ရဲ့ တပ်တွေထဲမှာ၊ တိုက်စိတ်ခိုက်စိတ်ကျဆင်းနေပြီး ဘာအတွက်စစ်ပွဲတိုက်နေရတယ်ဆိုတာ သေသေချာချာ ရှင်းရှင်းလင်းလင်းမရှိဘူးလို့ သုံးသပ်လို့ရတယ်။ အရင်လို ပြည်ထောင်စုဖြိုခွဲသူတွေဆိုပြီး တပ်တွင်းစည်းရုံးဝါဒဖြန့်ပြီး အတွေးအခေါ်တပ်ဆင်လို့လဲမရဖြစ်နေတယ်။ စစ်တပ်ရဲ့ သဘောသဘာဝအတိုင်း အထက်အမိန့်ကိုမလွန်ဆန်နှိုင်တဲ့အတွက် ‘သူ့ဆန်စားရဲမှ’ ဆိုတဲ့အနေအထားအရသာ ပါလာပြီး လိုက်လုပ်နေရတဲ့အခြေအနေပဲရှိနေတယ်။ ဒီတော့ လူမျိုးစုလက်နက်ကိုင်အဖွဲ့အစည်းတွေမှာပါဝင်နေတဲ့ တော်လှန်ရေးတပ်ဖွဲ့ဝင်တွေနဲ့ စိတ်ဓါတ်ရေးရာကွာခြားသွားပြီ။ လူမျိုးစုတွေက သူတို့နယ်မြေကာကွယ်စစ်၊ သူတို့လူမျိုးကို တခြားလူမျိုးတမျိူးက လာရောက်ဗိုလ်ကျစိုးမိုးတာကို ခုခံကာကွယ်ရမယ်ဆိုတဲ့စိတ်ဓါတ်၊ နယ်မြေကျွမ်းကျင်မှု စသည်ဖြင့်ကွာခြားသွားခဲ့တယ်။ လက်နက်ခဲယမ်းမီးကျောက်အရ ဦးသိန်းစိန်တို့ဘက်က သာချင်သာနေမယ်၊ ဒါပေမယ့် ကိုယ့်နယ်မြေကိုယ်ကာကွယ်မယ်ဆိုတဲ့ အမျိုးသားရေးစိတ်ဓါတ်ပိုင်းက တိုင်းရင်းသားတော်လှန်ရေးသမားတွေက အပုံကြီးသာတယ်။ အဲဒါကြောင့် တိုက်ပွဲတွေမှာအထိနာတော့တာပေါ့။
၎။ အဲ … နောက်တခုက၊ အင်အားရေသောက်မြစ်နဲ့ စစ်ရေးစစ်ရာအတွေ့အကြုံနည်းပါးတဲ့ ပြဿနာပါ။ ၁၉၉၈ခုနှစ် နအဖလက်ထက်ကတည်းလောက်ကစပြီး တပ်တိုးချဲ့ ဖွဲ့စည်းမှုကိုလုပ်ခဲ့တယ်။ အင်အားအခြေခံမရသေးပဲ တပ်အသစ်တွေတိုးချဲ့ ဖွဲ့စည်းတာပေါ့။ အဲဒီမှာ နဂိုရှိပြီးသားတပ်တွေကနေ၊ တပ်အသစ်တွေကိုဦးဆောင်ဖို့ ခွဲတမ်းတွေပို့ပေးရတယ်။ အဲဒါက နဂိုရှိပြီးသားတပ်မှာလည်း လူလျော့၊ တပ်အသစ်မှာလည်း ဖွဲ့စည်းပုံမပြည့်နဲ့ ဟန်ကိုယ့်ဖို့တပ်တွေအနေအထားကို ရောက်ကုန်တယ်။ ဒါ့အပြင် တနှစ်တနှစ်ကို တပ်အားလုံးကနေထွက်ပြေးတဲ့စစ်သည်တွေကလည်း ၆၀၀၀ လောက်ရှိနေတယ်။ အတွင်းစကားတွေအရဆိုရင် အငြိမ်းစားဆိုတဲ့ ဗိုလ်ချုပ်မှူးကြီးသန်းရွှေကိုယ်တိုင် မကြာခဏညည်းညူရတယ်ဆိုဘဲ။ ဒီထက်ထူးခြားတာက နဂိုကတည်းကမှ၊ တိုက်စွမ်းရည်ကျပြီး၊ ဖိနှိပ်မှုတွေများနေတဲ့စစ်တပ်ထဲမှာ တပ်ဖွဲ့ဝင်တွေဟာ နှုတ်ထွက်ခွင့်တွေအများကြီးတင်လာတဲ့ကိစ္စပေါ့။ အဲဒီလို တင်လာသမျှကိုလည်းနှုတ်ထွက်ခွင့်မပေးပဲ လူသစ်(၁၀)ယောက်ရှာပေးနှိုင်မှ နှုတ်ထွက်ခွင့်ပြုမယ်ဆိုပြီး အမိန့်က အပေါ်ကလာတော့ သဘောင်္ဆိပ်၊ ကားဆိပ်၊ လူသူစုဝေးတဲ့နေရာတွေမှာ အရွယ်မရောက်သေးတဲ့လူငယ်တွေဟာ ပစ်မှတ်ဖြစ်လာခဲ့ပြီး မြင်မြင်သမျှ စိတ်ပါသည်ဖြစ်စေ၊ မပါသည်ဖြစ်စေ အတင်းစစ်ထဲသွပ်သွင်းရတော့တာမဟုတ်လား။ ရှေ့ တန်းမှာ စစ်ဆင်ရေးဝင်လာတဲ့အခါ တချို့ လူငယ်တွေဟာ သေနတ်ကိုမနိုင်ပဲ လည်ပင်းတွဲလောင်းချိတ်ပြီးပါလာတာတွေပါ တွေ့ခဲ့ဘူးတယ်။ အဲဒီမှာ တပ်ထဲမှာ စရိုက်ပေါင်းစုံလူတွေပါလာပြီး ခိုးဆိုး၊ မုဒိမ်းကျင့်၊ လူထုကိုဗိုလ်ကျတဲ့တပ်လို ဖြစ်လာတယ်။ အခုဆိုရင် ကိုယ့်ကိုယ်ကိုအဆိုပြုပြီး စစ်ထဲဝင်တာ တပ်သားသစ်တွေထဲမှာအတော်ရှားပါးသွားပြီ။ ဗိုလ်တွေများနေပြီး ဗိုလ်တထောင် ရဲဘော်တကျိတ်တပ်မျိုးဖြစ်လာတယ်။ ဒါကြောင့်ဖွဲ့စည်းပုံ (၇၇၇) ယောက်မပြည့်ပဲ၊ တပ်တတပ်ကို ၁၅၀၊ ၂၀၀၊ ၃၀၀ တွေဖြစ်ကုန်တော့တယ်။ အခု ကချင်ဒေသနဲ့ ရှမ်းပြည်မြောက်ပိုင်းဒေသထဲကို စစ်ဆင်ရေးဝင်လာတဲ့တပ်မတတပ်ဟာ စစ်ထွက်အင်အား(၇၀၀)နဲ့ (၈၀၀) ထက်မပိုတော့ပါ။ အဲဒီလိုဖြိုသလစ်တပ်ဖြစ်နေတာပါ။ ဒီကြားထဲ စစ်ဆင်ရေးမှာထိခိုက်ကျဆုံးရှိတော့ ပိုပြီးတပ်ပျက်တဲ့အနေအထားပေါ့။ DKBA နဲ့ဖြစ်ခဲ့တဲ့တိုက်ပွဲတခုဆိုရင် စစ်တပ်ဘက်ကခြုံခိုစောင့်ပြီး ဒီကေဘီအေပျောက်ကြားအဖွဲ့ကို တိုက်တယ်။ ခြုံခိုစောင့်ပြီးတိုက်တယ်ဆိုတာ စစ်သဘောအရ လက်ဦးမှုအသာစီးရယူတာပါ။ ဒါပေမဲ့တကယ်ဖြစ်တော့ စစ်တပ်ဘက်က ဗိုလ်ကြီးတဦးနဲ့ အင်အားအတော်များများကျဆုံး ဒဏ်ရာရသွားတယ်တဲ့။ ဒါကိုကြည့်ရင် စစ်မှုရေးရာအတွေ့အကြုံနဲ့ စိတ်ဓါတ်မှာ ဘယ်လောက်ထိ ကွာခြားနေပြီဆိုတာ သိသာလွန်းတယ်။ တခြားအဲဒီလိုဖြစ်စဉ်တွေလည်း အများကြီးရှိတာပေါ့။
၅။ ဒီထက်အဆိုးဝါးဆုံးအဖြစ်အပျက်ကတော့ တပ်အသစ်တွေအပြင် နဂိုရှိပြီးသားတပ်ရင်းတွေကို ကိုယ့်ဖါသာကိုယ် ရိက္ခာဖူလုံအောင်လုပ်ခိုင်းတဲ့ကိစ္စ။ အဲဒီပြဿနာရဲ့ နောက်ဆက်တွဲက တပ်ရင်းမှူးတွေရဲ့ အိပ်တွေဖေါင်းပြီး ရဲဘော်တွေမှာ စစ်ဆင်ရေးကပြန်လာလည်း မနားရ။ မီးသွေးဖုတ်၊ ဟိုသစ်ပင်စိုက် ဒီသစ်ပင်စိုက်ရနဲ့အားရတယ်မရှိတော့ဘူး။ နောက်တဆင့်က တပ်ပိုင်မြေတွေသိမ်းတဲ့အလုပ်လုပ်လာတာ။ လယ်သမားပိုင်မြေ၊ စားကျက်မြေ၊ မြေရိုင်းတွေကို ကိုယ်တိုင်ချွေးထွက်အောင် ဘာမှမလုပ်ပဲ၊ သိမ်းချင်သလို သိမ်းလာခဲ့တာ သိမ်းနေတာ။ ဘိုးဘေးဘီဘင်လက်ထက် ကတည်းပိုင်ဆိုင်လာတဲ့ဒေသခံတွေရဲ့  ဥယျာဉ်ခြံမြေ၊ လယ်မြေနဲ့ ကျွဲနွားတိရိစ္ဆာန်တွေအတွက်ကျောင်းဖို့ထားတဲ့မြေတွေကို အတင်းအကြပ်သိမ်းတယ်။ ပြည်သူတွေဟာ မျက်ရည်နဲ့သူတို့ဘ၀တွေကိုဖြတ်သန်းရတယ်။ စစ်တပ်အပေါ် ပြည်သူတွေရဲ့ ထောက်ခံမှု မြန်မာပြည်ဘယ်နေရာမှာမှမရတော့ပဲ ဆုံးရှုံးခဲ့တယ်။ ထောက်ခံတာဆိုလို့ စစ်တပ်မိသားစုနဲ့ စစ်တပ်ကြောင့်ကြီးပွားချမ်းသာလာသူတွေပဲရှိတော့တဲ့အခြေကို ဆိုက်လာတယ်။
၆။ အချုပ်အနေနဲ့ ဒီနေ့ဦးသိန်းစိန်အစိုးရဦးဆောင်မှုအောက်မှာရှိတဲ့စစ်တပ်ဟာ တိုက်စွမ်းရည်ကျ၊ အင်အားရေသောက်မြစ်လည်း စနစ်တကျမရ၊ ပြည်သူထောက်ခံမှုလည်းမရ၊ တပ်ဖွဲ့ဝင်များအတွင်းလည်း တိုက်စိတ်ခိုက်စိတ်ကျဆင်းနေတဲ့အပြင် နယ်လှည့်တပ်မ (၁၁) မထဲမှ ကချင်နဲ့ ရှမ်းပြည်နယ်မြောက်ပိုင်းဧရိယာထဲကို တပ်မ(၁၁)၊ (၃၃)၊ (၅၅)၊ (၆၆)၊ (၇၇)၊ (၈၈)၊ (၉၉)နဲ့ စကခတွေကိုအသုံးပြုပြီး အပြင်စည်းစစ်ဆင်ရေးကိုလုပ်ဆောင်နေရတယ်။ ကရင်ဘက်ကိုလည်းသေနတ်ပြန်မပေါက်အောင် မက်လုံးတွေနဲ့ မနည်းစည်းရုံးထားရတဲ့အနေအထား။ တပ်တွေမှာလည်း အရင်လိုစစ်ဆင်ရေးကာလ (၄) လ မဟုတ်ပဲ တနှစ်ကျော်အထိတာဝန်ထမ်းဆောင်နေရတယ်။ အဲဒီအခါ တိုက်ပွဲတွေမှာလည်း ထိခိုက်ကျဆုံးမှုရှိ၊ နောက်တန်းလည်းပြန်မရ၊ တပ်ဖွဲ့အတွင်း အထက်အောက်ဆက်ဆံရေးကလည်း ဖိနှိပ်မှုများတော့၊ ထွက်ပေါက်အနေနဲ့ လက်နက်ကိုင်ယောင်္ကျားရင့်မကြီးတွေအတွက် အလွယ်ဆုံးဖြစ်တဲ့ အမျိုးသမီးတွေအပေါ်စော်ကားတာနဲ့ ပြည်သူတွေကို သတ်ဖြတ်မှုတွေလုပ်လာတာတို့ ပိုဖြစ်လာတယ်လို့ ထင်မြင်မိပါကြောင်း…။
ပန်သစ္စာ
၀၈.၀၂.၂၀၁၅
ဓာတ်ပုံ - Kachinland News မှ

No comments:

Post a Comment

Related Posts Plugin for WordPress, Blogger...