Sunday, March 8, 2015

နာဇီပါတီနှင့် ၀ါဒ ဖြန့်ချီရေး ယန္တယား

 
နာဇီ ပါတီ၏ ၀ါဒဖြန့်ချီရေး ယန္တယားသည် ဟစ်တလာ အာဏာမရခင် နှင့် ရပြီးကာလများ (၁၉၃၃-၁၉၄၅) အတွင်း အရှိန်အဟုန် နှင့် လည်ပါတ်ခဲ့သည်။ ၁၉၁၉ တွင် တဖက်သတ် ချုပ်ဆိုခံခဲ့ရသော ဗာဆေးစာချုပ်ကြောင့် စိတ်ဓါတ်ယို့ယွင်းလာနေသော ဂျာမာန် လူထုအတွက် စစ်သွေးကြွ အမျိုးသားရေးဝါဒ ကို စတင်ဝါဒဖြန့် သွတ်သွင်းခဲ့ကြသည်။

အောက်ဖေါ်ပြပါ စာတမ်းသည် ၁၉၂၅-၂၆ တွင် ဟစ်တလာကိုယ်တိုင် ရေးသားခဲ့သော မိန်းကမ့် (Mein Kampf) မှ ၀ါဒဖြန့်ချီရေးနှင့် ပါတ်သက်သော အကြောင်းအရာ ဖြစ်ပြီး နာဇီ အုပ်ချုပ်ရေး ကာလတလျောက်လုံး လက်စွဲ အဖြစ် အသုံးပြုခဲ့ကြသည်။
(“၀ါဒဖြန့်ချီရေးသည် ကျယ်ပြန်သော လူထုလူတန်းစား အလွှာအသီးသီးကို ဦးတည် ဆွဲဆောင်နိူင်ရမည်။ လူကြိုက်များနိူင်မည့် အသွင်ဖန်တီးနိူင်ရမည်ဖြစ်ပြီး မိမိရည်ရွယ်သော လူတန်းစား၏ နားလည်နိူင်သော ပညာညဏ်အတိုင်းအတာကို အထူးသတိပြု ရပေမည်။ ၎င်းတို့၏ စိတ်ခံစားမှုကို ဆွဲဆောင်နိူင်ရန်လိုပြီး ၀ါဒဖြန့်ချီရေး သဘောတရားကို မျက်ခြေမပြတ်ပဲ လူထု၏ စိတ်ကူးစိတ်သန်းများကို နှိုးဆွနိူင်ရမည်။ ၎င်းတို့၏ နှလုံးသားကို ဆွဲကိုင်လှုပ်ရမ်းနိူင်မည့် အခြင်းအရာကို စိတ်ပညာ ရှု့ဒေါင့်မှ ရှာဖွေနိူင်ရမည်။ မိမိတို့ ပြစ်မှတ်ထားသော လူတန်းစားများမှာ သံတမာန်များ၊ ပါမောက္ခများ၊ အကျိုးအကြောင်း ဆီလျော်စွာ တွေးခေါ်နိူင်စွမ်းရှိသော သူများ ပါဝင်မည်မဟုတ်၊ အဓိက ထားရမည့်သူများမှာ အတွေးအခေါ် အယူအဆများကို ခုတမျိုး တော်ကြာတမျိုး အမြဲတစေ ပြောင်းလဲလွဲသော ကလေးသာသာ အတွေးရှိသော လူများ (Human Children) ကိုသာ ရည်ရွယ်ရမည်။
(စာရေးသူ-- သူများပြောသည်ကို ယုံလွယ်ခြင်းကို ရည်ညွှန်းသည်)
နိူင်ငံရှိ လူအများစု၏ သွင်ပြင်လက္ခဏာနှင့် အမြင်များသည် အမျိုးသမီး စရိုက် (Feminism) နှင့် ပို၍ ဆင်တူနေတတ်သဖြင့် ၎င်းတို့၏ အတွေးအခေါ် နှင့် ပြုမူဆောင်ရွက်ချက်များသည် တည်ကြည် စွာ အကျိုးသင့် အကြောင်းသင့် စဉ်းစားချင်းထက် စိတ်ခံစားမှုကို ပို၍ အလေးပေးတတ်သော သဘောရှိသည်။
အဆိုပါ စိတ်ခံစားမှုများသည် ရှုပ်ထွေးနက်နဲမနေ၊ လွယ်ကူပြီး တသမတ်တည်းဖြစ်ကာ အချစ်၊အမုန်း၊အမှား၊ အမှန်၊ အမှန်တရားနှင့် ဖေါက်ပြန်မှုစသည့် ကွဲပြားခြားနားရန် မခက်ခဲသော အမြင်များသာ ဖြစ်သည်။
ထို့အတွက် ၀ါဒဖြန့်ချီသူများအနေဖြင့် မိမိ ဦးတည်သည့် အကြောင်းအရာအား ဓမ္မဌိထန်ကျကျ ဘက်နှစ်ဖက် သုံးသပ်ရန် မလို၊ ဤသို့ပြုလုပ်က အခြားတဘက်ကို အထောက်အကူပြုရာ ရောက်နိူင်ပေသည်။ သီအိုရီများ စည်းမျဉ်းများကို ကိုးကား၍ မိမိအတွက် အကျိုးရှိမည့် ဘက်ကိုသာ အမှန်တရားအဖြစ် တင်ပြနိူင်စွမ်းရှိရမည်။

လူထု လူတန်းစား အလွှာအသီးသီးမှ လူအများ၏ ခံယူနိူင်မှုသည် အကန့်အသတ်သာရှိပြီး အားပျော့တတ်သည့် အသွင်ရှိသည်။ ဆိုလိုသည်မှာ အလွယ်တကူ မေလျော့သွားနိူင်သည်။ သို့ဖြစ်၍ ၀ါဒဖြန့်သူများအနေဖြင့် မရှိမဖြစ်လိုအပ်သော အချက်အလက်များကို တတ်နိူင်သမျှ ကျစ်လစ်၍ ပုံစံခွက်ထဲထည့်သွင်းကာ အဆက်မပြတ် ထပ်တလဲလဲ ပြောဆိုခြင်းဖြင့် အားလုံးမကျန် မိမိပြောလိုသည်ကို နားလည်လာကြပေမည်။
အဆိုပါ မိန်းကမ့် ပါ ၀ါဒဖြန့်ချီရေး လမ်းညွှန်ချက်များကို အသုံးပြု၍ ဂျူးဆန့်ကျင်ရေး ဥပဒေများ၊ နုရင်ဘတ် ဥပဒေ ဟု အမည်တွင်သည့် အာရန် (Aryan) မဟုတ်သူများ နှင့် ဂျူး၊ ဂျစ်ပစီ၊ လူမည်များ ထိမ်းမြားခြင်းကို တားမြစ်သည့် ဥပဒေများ၊ မစွမ်းမသန်သူများအား ကိစ္စတုံး စီရင်သည့် အစီအစဉ် (T-4 Euthanansia) ၊ နှင့် ဗာဆိုင်းစာချုပ်အပေါ် အပြစ်ပုံချဝါဒဖြန့်ခြင်း အစရှိသည်တို့ကို အောင်မြင်စွာ ပြုလုပ်နိူင်ခဲ့သည်။
ထို့အပြင် Sturmabteilung (SA) ကို ဖွဲ့စည်းခဲ့သည်။ ယင်းသည် ဟစ်တလာ အာဏာရရှိလာရေးအတွက် များစွာအထောက်အကူ ပြုခဲ့သည့် မုန်တိုင်းတပ်( ရှပ်ညို)ဟု နောက်ပိုင်းတွင် လူသိများလာခဲ့သည်။ ၎င်းအား ပြည်သူ့လက်ရုံးတပ်ဖွဲ့များအသွင် ဖွဲ့စည်းပြီး အဓိကတာဝန်မှာ နာဇီလူထုအခမ်းအနားများတွင် လုံခြုံရေးယူရန် နှင့် အတိုက်အခံတို့၏ လူထု စုဝေးမှုများကို ဖျက်ဆီး ချေမှုန်းရန် ဖြစ်သည်။
ဒုတိယ ကမ္ဘာစစ်အတွင်းက ရှေ့တန်းစစ်မျက်နှာရှိ တိုက်ပွဲသတင်းများ၊ ရှုံးနိမ့်မှုများကို သရော်သည့်အကြောင်းများ၊ ကျဆုံးသွားသော ဂျာမာန်စစ်သားများအား အမိမြေအတွက် အသက်ပေးခဲ့သော သူရဲကောင်းများ အဖြစ် ချီးကျူးဂုဏ်ပြုမှုများကို ရေဒီယိုမှ နေ့စဉ်နီးပါး အထက်ပါ နည်းလမ်းများကို သုံး၍ ထုတ်လွှင့်ခဲ့ကြသည်။

No comments:

Post a Comment

Related Posts Plugin for WordPress, Blogger...