Wednesday, August 26, 2015

"ဒေါ်အောင်ဆန်းစုကြည်သို့ မေတ္တာရပ်ခံချက်"

ယနေ့အချိန်သည်၂၀၁၅ခုနှစ်၊ နိုဝင်ဘာလ (၈) ရက်နေ့တွင် ကျင်းပမည့်ရွေးကောက်ပွဲတွင် အမျိုးသား ဒီမိုကရေစီ အဖွဲ့ချုပ် အနိုင်ရရေး သက်သက်သာမဟုတ် အနိုင်ရပြီးနောက် စည်းလုံးညီညွတ်စွာ ပြည်သူတို့၏ဆန္ဒကို အင်နှင့်အားနှင့် အကောင်အထည်ဖော်နိုင်ဖို့ လိုသည်ဟု မြင်သည်။ ဤကဲ့သို့ အခြေအနေတွင် ဗဟိုအလုပ်အမှုဆောင်အဖွဲ့သည် ပါတီတွင်းဒီမိုကရေစီကျင့်စဉ်နှင့် မူဝါဒများအတိုင်း မကျင့်သုံးဘဲ တိုင်းဒေသကြီး၊ မြို့နယ်၊ ပြည်နယ်များမှ ပါတီဝင်အများစုက မဲဖြင့် ရွေးချယ်တင်ပေးလိုက်သည့် လွှတ်တော် ကိုယ်စားလှယ်လောင်း များကို မရွေးချယ်ဘဲ မဲအနည်းငယ်သာရသည့် ကိုယ်စားလှယ်များကို ချမှတ်ထားသော မူဝါဒများနှင့် ဆန့်ကျင်လျက် မိမိလူများကိုသာ လက်သိပ်ထိုးရွေးချယ်ခဲ့သဖြင့် ပါတီအတွက် စွမ်းစွမ်းတမံ လုပ်နေသူများကို ပါတီဦးဆောင် နေသူများ အပေါ် ယုံကြည်မှုကင်းမဲ့သွားစေပြီး ပါတီဝင်မဟုတ်သည့် ဝိုင်းရံပြည်သူများ ကိုလည်း စိတ်ပျက်လက်ပျက် ဖြစ်ပေါ်စေခဲ့ကြောင်း ကြားသိရသည်။

ထိုသို့ဖြစ်ပျက်နေမှုကို တည့်မတ်လာရန် လုပ်ဆောင်နိုင်သူသည် ဒေါ်အောင်ဆန်းစုကြည် တစ်ဦးတည်းသာ ရှိသည်ဟု မြင်သည်။ စာရေးသူအနေနှင့် အမျိုးသားဒီမိုကရေစီအဖွဲ့ချုပ်သည် ပြည်သူတို့အားကိုးရမည့် တစ်ခုတည်းသော ပါတီဖြစ်သည်ဟု ယုံကြည်သည်။ မည်သူပါသည်ဖြစ်စေ အမျိုးသားဒီမိုကရေစီအဖွဲ့ချုပ်ပါတီ ကိုယ်စားလှယ်လောင်း ဖြစ်လျှင် နိုင်ခြေများကြောင်း လူတိုင်းသိသည့်အနေအထားဖြစ်သည်။
၁၉၉၀ ခုနှစ်၊ ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်မှ လွှတ်တော်အမတ် ၈၂% ကျော်ဖြင့် အနိုင်ရခဲ့သော်လည်း စစ်အစိုးရမှ အာဏာလွှဲပြောင်းမပေးဘဲ ဖိအားပေးဖမ်းဆီးနှိပ်စက်လာသောအခါ လွှတ်တော် အမတ်များထဲမှ အဖမ်းအဆီးမခံရဲသူများ တဖြုတ်ဖြုတ် နှုတ်ထွက်ကုန်ကြပြီး အမာခံတစုသာ ကျန်သည်ကို သတိပြုမိဖို့ လိုပေသည်။
အမျိုးသားဒီမိုကရေစီအဖွဲ့ချုပ်သည် ၁၉၈၉ ခုနှစ်မှ ၂၀၁၅ခုနှစ်အထိ ကြံ့ကြံ့ခံ ရပ်တည်လာနိုင်ခြင်းမှာ ပါတီအပေါ် အသေခံအနစ်နာခံပြီး မိမိကိုယ်ကျိုးကိုစွန့်လွှတ်လျက် ယုံကြည်ချက်ဖြင့် ရပ်တည်ပေးကြသော အမာခံ ပါတီဝင်များ ကြောင့်သာ ဖြစ်သည်။ မည်သူက မာသည် မည်သူက ပျော့သည်၊ မည်သူက ခံယူချက်ရှိသည်၊ မည်မျှ အရည်အချင်း ရှိသည်တို့ကို ၂၅ နှစ်တာ ကာလတွင် ကွဲပြားစွာသိနေကြပြီဖြစ်သည်။ ထို့ကြောင့် ၁၉၉၀ ခုနှစ်ကကဲ့သို့ ကျဉ်းထဲ ကြပ်ထဲကျရောက်လာလျှင် ကြံကြံခံနိုင်မည့် လူကောင်းများ၊ မကြောက်မရွံ့ ပြောနိုင်ဆိုနိုင်သောသူများ အဓိကပါနိုင်ဖို့ လိုပေသည်။ ပညာတတ်ညဉ်သည် အလွန်ကြောက်စရာ ကောင်းသည်။ ကိုယ်ကျိုးသက်သက်သာကြည့်သော ပညာတတ်များကို ခါးပိုက်ထဲ ထည့်မိလျှင် ငါးပါးမှောက်နိုင်ပါသည်။
ဒေါက်တာဒေါ်ညိုညိုသင်းကို မရွေးချယ်သည့် ကိစ္စသည် အလွန်အရုပ်ဆိုးသောအမှု ဖြစ်ပါသည်။ စုံစမ်းစစ်ဆေးရန် မလိုအောင်ရှင်းလင်းလှသော ဗဟိုအလုပ်အမှုဆောင်ကော်မတီ၏ ချမှတ်ထားသောမူနှင့် ဆန့်ကျင်၍ ဘက်လိုက် ဆုံးဖြတ်မှုဖြစ်သည်။ ဗဟန်းမြို့နယ်နှင့် ရန်ကုန်တိုင်းအဆင့် NLD အမှုဆောင်များနှင့် အောင်နိုင်ရေး ကော်မတီဝင်များ၏ ရွေးချယ်လျာထားခြင်းကို ခံခဲ့ရပြီး မှ ဗဟိုမှ ပယ်ချခဲ့ခြင်းသည် မဖြစ်သင့် မဖြစ်ထိုက်သည့်ကိစ္စ ဖြစ်ပါသည်။ ထို့အပြင် လသာမြို့နယ်မှ ရွေးချယ်လိုက်သည့် ခင်မို့မို့အောင်၏လျှောက်လွှာကို ဇူလိုင်လ ၁၇ရက်နေ့၌ ဦးဥာဏ်ဝင်းကိုယ်တိုင် လာတင်ခြင်းဖြစ်ကြောင်းလည်း ကြားသိရပြီး၊ မဲခွဲသည့်အခါ အေးမြမြမျိုးက ၁၂မဲရရှိပြီး ခင်မို့မို့အောင်သည် ၈ မဲသာရရှိသော်လည်း ခင်မို့မို့အောင်ကိုသာ ဗဟိုက ရွေးချယ်လိုက်ပြန်ပါသည်။ ကမာရွတ်NLD အောင်နိုင်ရေးကလည်း သူတို့တင်ပေးသည့် သူတွေမပါသည့်အတွက် နုတ်ထွက်မည်ဖြစ်ကြောင်း ကြားသိရ ပြန်သည်။
နောက်တခုမှာ တိုင်းအောင်နိုင်ရေးကော်မတီဝင်တစ်ဦးကလည်း သူသည် တိုင်းရွေးချယ်ရေးအဖွဲ့တွင် ပါဝင်ခဲ့သည့်အတွက်တိုင်းရွေးချယ်ရေးမူဝါဒကို နားလည်သိရှိပြီးဖြစ်သော်လည်း ဗဟိုစိစစ်ရေးက မည်သည့် မူဝါဒများနှင့် ရွေးချယ်ခဲ့သည်ဆိုခြင်းကို သူမသိသည့်အတွက် မည်သည့်မူဝါဒမျေား ချမှတ်ပြီး ရွေးချယ်သည် ဆိုခြင်းကို သိရှိရန် စောင့်နေပါသည်ဟု ဆိုထားသည်။ အဓိကပြဿနာမှာ တိုင်းကရွေးချယ် ပေးလိုက်သည့် လူကြိုက်အများဆုံး၊ မဲအများဆုံးရသည့် ကိုယ်စားလှယ်လောင်းများကို ဗဟိုစိစစ်ရေးက ဗြောင်းပြန် လှန်လိုက်သည့်သဘော ဖြစ်နေခြင်းဖြစ်သည်။
လက်ရှိအာဏာရ ကြံခိုင်ဖြိုးပါတီမှ မြို့နယ်၊ တိုင်း၊ ခရိုင်အတွင်းရှိ လူရိုသေရှင်ရိုသေ ပုဂ္ဂိုလ်များကို စည်းရုံးပြီး မိမိတို့ပါတီသို့ ဝင်ပြီးအရွေးခံရန် စည်းရုံးခြင်း၊ မဝင်လိုပါကလည်း တသီးပုဂ္ဂအဖြစ်ဝင်ရောက်ရန်အားပေးပြီး လိုအပ်သော အကူအညီများကို ပေးမည်ဖြစ်ကြောင်း ကမ်းလှမ်းနေချိန်တွင် ဒေါက်တာဒေါ်ညိုညိုသင်းကဲ့သို့ လွှတ်တော်တွင်း ပြည်သူ့နစ်နာချက်များကို မားမားမတ်မတ် ရပ်တည်တိုက်ပွဲဝင်နေသည့် မှတ်ကျောက်တင် ခံနိုင်သည့် အမျိုးသမီးသူရဲကောင်းတစ်ဦးကို NLD မှဖိတ်ခေါ်ပြီး အရှက်ခွဲသလို ပြုလုပ်လိုက်ခြင်းသည် အလွန်အရုပ်ဆိုးလွန်းပါသည်။ လောလောလတ်လတ် “လူထုရှေ့ဆောင်ဆု” ကိုလည်း သူမ၏လုပ်ရပ်များကြောင့် ရရှိထားသူဖြစ်သည့်အပြင် သူမအနေနှင့် NLD ပါတီသို့ မဝင်ပဲ တသီးပုဂ္ဂလအမတ်ဖြင့်ပင် အရွေးခံနိုင်သည့် လူကြိုက်များသူတစ်ဦးဖြစ်သည်။ ထိုကဲ့သို့သောသူမျိုးကို မျက်နှာလွှဲခဲပစ်လုပ်လိုက်သည့်အတွက် NLD အနေနှင့် ရှေ့တန်းတိုက်စစ်မှူးတစ်ယောက် ဆုံးရှုံးသွားပြီဖြစ်သည်။ ထို့အပြင် ပွင့်လင်းမှ ကိုကိုကြီးသည်လည်း အရွေးမခံရပေ။ အဘယ့်ကြောင့် သူတို့ကို မရွေးချယ်ရသည်၊ ရွေးချယ်လိုက်သူများသည် သူတို့ထက် ကောင်းမွန် သည့် အရည်အချင်း ရှိသူများ ဖြစ်ကြောင်း ရှင်းလင်းပေးနိုင်ရမည် ဖြစ်သည်။ အဓိကပြောချင်သည်မှာ အောက်ခြေထု ယုံကြည်သူများနှင့် အဖွဲ့ချုပ်ကိုဦးဆောင်တိုက်ပွဲဝင်မည်လော၊ မိမိဗဟိုဦးဆောင်မှုကော်မတီမှ လူတစုက ရွေးချယ်ပေးလိုက်သည့် လူများနှင့်တိုက်ပွဲဝင်မည်လောဟု ရွေးသည့်အခါ အောက်ခြေထူတရပ်လုံးက ယုံကြည်မှုမရှိသူများနှင့် ဦးဆောင်လျှင် ကောင်းကျိူးထက်ဆိုးကျိုးသာလျှင်များမည်ဖြစ်ပြီး အများသဘောဆန္ဒကို ငြင်းပယ်ခြင်းသည် ဒီမိုကရေစီကျင့်စဉ်နှင့်ဆန့်ကျင်ခြင်းပင်ဖြစ်သည်။
အထက်ပါအချက်များသည် NLD ဗဟိုစိစစ်ရေးအဖွဲ့အတွင်း အကြီးအကျယ် ဖေါက်ပြန်မှု၊ မသမာမှု၊ အုပ်စုဖွဲ့မှုနှင့် ဘက်လိုက်မှုများ ရှိနေကြောင်း ထင်ရှားစေသည်။ ထိုကိစ္စကြောင့် NLD ပါတီညီညွတ်ရေးကို များစွာ ထိခိုက် စေနိုင်ပါသည်။ ထိုပြဿနာကို ဒေါ်အောင်ဆန်းစုကြည်မှတပါး အခြားသူများ မဖြေရှင်းနိုင်သောကြောင့် အများအကျိုးအတွက် အမြန်ဆုံးဖြေရှင်းပေးရန် မေတ္တာရပ်ခံလိုက်ပါသည်။
ဤမေတ္တာရပ်ခံစာကို ရေးသားရခြင်းမှာ NLD ကို အနိုင်ရရေးသက်သက်မဟုတ်၊ အနိုင်ရပြီးနောက် မိမိလုပ်ချင်သည့် တိုင်းပြုပြည်ပြုအကျိုးကို ပါတီဝင်များနှင့် ပြည်သူများ တက်ညီလက်ညီ စွမ်းစွမ်းတမံ လုပ်ဆောင်နိုင်ရေးကို ရှေးရှု၍ ရေးသားလိုက်ခြင်း ဖြစ်ပါသည်။ ယခုအခါ ကျရောက်နေသော ရေဘေးကြောင့် ရွေးကောက်ပွဲကော်မရှင်မှ လွှတ်တော်ကိုယ်စားလှယ်တင်သွင်းမှုကို ၈ ရက်တိုးပေးလိုက်သည်ကို အခွင့်ကောင်းယူ၍ အများကြိုက်နှစ်သက်ပြီး စွမ်းဆောင်နိုင်စွမ်းကြီးမားသော သူများကို အချိန်မီရွေးချယ်နိုင်ပါက ဝမ်းသာရမည်ဖြစ်သည်။
ကျွန်တော် စတင်ဦးဆောင်ခဲ့သည့် ABSDF အဖွဲ့အစည်းကြီးသည်လည်း လက်နက်ကိုင်တိုက်ပွဲကို ဆင်နွှဲပြီး အောင်ပွဲခံမည်ဟု အားခဲခဲ့သော်လည်း ကျွန်တော် နှုတ်ထွက်ပြီးနောက် လက်နက်ကိုင်တော်လှန်ရေးကို ယုံကြည်မှု မရှိဘဲ ခံယူချက်မရှိသည့် ပညာတတ်လူတန်းစားများ ခေါင်းဆောင်မှုနေရာ ရယူလာပြီး အဖွဲ့အစည်းအတွင်း အုပ်စုများဖွဲ့ကာ ဗိုလ်လုခြင်း၊ မူဝါဒများ ချမှတ်ထားလင့်ကစား နေရာရရေးအတွက် မလိုက်နာခြင်း၊ နောက်ဆုံးရန်သူကို မတိုက်တော့ဘဲ အချင်းချုင်း ဇာတ်တူသားစား သတ်ဖြတ်ခဲ့မှုကြောင့် ပြည်သူများ၏ ယုံကြည်ကိုးစားမှု ပျောက်ကွယ်ခဲ့ရသည်။
ဒေါ်အောင်ဆန်းစုကြည်က ကတုတ်ကျေးရွာ၊ ဘုရားကြီးမြို့နယ်တွင် “လူကိုမကြည့်ဘဲ ပါတီကိုသာ ကြည့်ပြီး မဲပေးပါ”ဟု ပြောဆိုချက်သည်လည်း အတွေးအခေါ်အရ လွဲမှားနေသည်ဟု ထောက်ပြလိုပါသည်။ တပါတီစနစ် ကြီးစိုးသောမဆလခေတ်ကဲ့သို့ ခေတ်မျိုးကို ကျနော်တို့ ပြန်မသွားလိုပါ။ မဆလခေတ်တွင် လူကိုကြည့်စရာမလိုဘဲ မဆလပါတီမှ ဘယ်သူ ရွေးရွေး ထိုပါတီမှ ရွေးသူကို မဲပေးရသဖြင့် လွှတ်တော် ကိုယ်စားလှယ်အနေနှင့် မထိုက်တန်သူများ၊ အရည်အချင်းမရှိသူများ လွှတ်တော်ထဲတွင် ပါလာခဲ့သဖြင့် တိုင်းပြည်တိုးတက်ဖွံ့ဖြိုးရေးထက် အထက်လူကြီးအကြိုက် လက်ညှိုးထောင် ခေါင်းညိတ်သူများကသာ အုပ်ချုပ်ရေးတွင် ပါလာပြီး “ဘာလုပ်လုပ် မှန်ပါသည် ခင်ဗျား” လုပ်ကြသဖြင့် အမှားလုပ်နေသည်များကို အမှန်ဟု ထင်ပြီး ဆက်သွားနေသဖြင့် တိုင်းပြည် ဆင်းရဲမွဲတေသွားခဲ့ရသည်။
ထို့ကြောင့် လူသည်လည်း အရေးကြီးသည့်နေရာမှပါသည်ဟု ပြောလိုပါသည်၊ မိမိပါတီခေါင်းဆာင်များ လုပ်ရပ်မှားနေလျှင်အများအကျိုးအတွက်ထောက်ပြဝေဖန်မှုပြုရဲသူများရှိမှသာပါတီတိုးတက်ဖွံ့ဖြိုးလာပြီးတိုင်းပြည်ကိုထိရောက်စွာ ဦးဆောင်နိုင်မည် ဖြစ်ပါသည်။ လူတိုင်းအမှားနှင့် မကင်းနိုင်ပါ။ ထိုအမှားကို ထောက်ပြနိုင်သူများ ထောက်ပြရဲသူများ ပါတီတွင် ပါဝင်ဖို့လိုပါသည်။ လက်ညှိုးထောင်ခေါင်းညိတ်များဖြင့် တိုင်းပြည်ကို ဦးမဆောင်နိုင်ပါ။ ထို့ကြောင့် ရွေးကောက်ပွဲနိုင်ပြီး အရှေ့ဥရောပနိုင်ငံများမှ ကွန်မြူနစ်အစိုးရများကို ဖြုတ်ချ၍ ရွေးကောက်ပွဲတွင် အနိုင်ရပြီး တက်လာသော ဒီမိုကရေစီခေါင်းဆောင်များကဲ့သို့ သက်တမ်းတခုအတွင်း လူကောင်းမရှိလျှင် မည်သည့် တိုးတက်ဖွံ့ဖြိုးရေးမှ မလုပ်နိုင်သဖြင့် ပြည်သူ့ထောက်ခံမှု မရရှိတော့ဘဲ နောက်တစ်ကြိမ် ရွေးကောက်ပွဲတွင် အနိုင်မရဘဲ ဆင်းသွားရသည့် အဖြစ်မျိုးကို မမြင်လိုသောကြောင့်သာ အပြုသဘောဆောင်သောဝေဖန်မှု (Constructive Criticism) ဖြင့် အသိပေးလိုက်ခြင်း ဖြစ်ပါသည်။
အလားတူဖြစ်ရပ်မျိုးကို အမျိုးသားဒီမိုကရေစီချုပ်တွင် မဖြစ်စေလိုပါ။ ဒီမိုကရစီနိုင်ငံကို ဖော်ဆောင်မည့် ပါတီကြီးတစ်ခု၏ ဗဟိုအလုပ်အမှုဆောင်ကော်မတီသည် ဒီမိုကရေစီကျင့်စဉ်အတိုင်း မလုပ်ဆောင်ခြင်းသည် အလွန်ရှက်စရာကောင်းပြီး ပါတီ၏ညီညွတ်ရေးကိုလည်း ထိခိုက်စေနိုင်ပါသည်။
ကျနော့်စေတနာကို နားလည်လိမ့်မည်ဟု မျှော်လင့်ပါသည်။
လေးစားစွာဖြင့်

ထွန်းအောင်ကျော် (၇၄ မျိုးဆက်)
အေဘီအက်စ်ဒီအက်ဖ် ဥက္ကဋ္ဌဟောင်း
၂၀၁၅ ခုနှစ် သြဂုတ်လ ၈ရက်

ရန်ကုန်တိုင်း အတွဲ(၁၁) အမှတ် (၃၂)
သြဂုတ် (၂၀) မှာပါတဲ့ ကျနော့်ရဲ့ဆောင်းပါး

No comments:

Post a Comment

Related Posts Plugin for WordPress, Blogger...