Friday, October 9, 2015

“ဖက်ဒရယ်ပြည်ထောင်စု”နှင့် အနီး အဝေး ( ဇင်လင်း )


ဒီနှစ်အတွင်းမှာ နိုင်ငံရေးပါတီတွေဆီကအကျယ်လောင်ဆုံး ထွက်ပေါ်လာနေတဲ့ အသံက တော့ ဖွဲ့စည်းအုပ်ချုပ်ပုံ အခြေခံ ဥပဒေပြန်လည်သုံးသပ်ပြင်ဆင်ရေး ဖြစ်ပါတယ်။ တိုင်းရင်းသားအင်အားစုတွေ ဆီကတော့ ဖက်ဒရယ် ပြည်ထောင်စု တည်ဆောက်ရေး၊ ပင်လုံကတိက၀တ် ဖေါ်ဆောင်ရေးဆိုတဲ့ အသံတွေ ဆက်တိုက်ကြားနေရပါတယ်။ တိုင်းရင်းသားတို့ရဲ့အသံ သို့မဟုတ် လိုလားတောင်းဆိုချက်တွေထဲမှာ အမျိုးသားတန်းတူညီမျှရေး၊ တိုင်းရင်းသားနယ်မြေတွေကိုယ်တိုင် အုပ်ချုပ်ခွင့်ရရှိရေး၊ ကိုယ့်ကံကြမ္မာ ကိုယ်ဖန်တီးခွင့်နဲ့ ကိုယ်ပိုင်ပြဋ္ဌာန်းခွင့်အပြည့်အဝရရှိရေး၊ စစ်မှန်တဲ့ ဖက်ဒရယ် ပြည်ထောင်စု ပေါ်ထွန်းရေး အစရှိသဖြင့် လိုလားတောင်းဆိုနေကြပါတယ်။တကယ်တော့ တိုင်းရင်းသားတွေ တောင်းဆိုနေတဲ့ အချက်တွေကလည်း ဖွဲ့စည်းအုပ်ချုပ်ပုံ အခြေခံဥပဒေပြန်လည်ပြင်ဆင်ရေးပဲ ဖြစ်ပါ တယ်။ နိုင်ငံရေး စီးပွားရေး လူမှုရေး ဥပဒေ အကာကွယ်တန်းတူရရှိရေးဆိုတဲ့ သဘောပါပဲ။


ဒါပေမယ့် စဉ်းစားစရာအချက်တခုကတော့ ဖွဲ့စည်းအုပ်ချုပ်ပုံ အခြေခံဥပဒေပြန်လည်ပြင်ဆင်ရေး ဆွေးနွေးကြတဲ့အခါ၊လက်ရှိ ၂၀၀၈ ဖွဲ့စည်းပုံထဲက ဒီမိုကရေစီသဘောနဲ့ တိုက်ရိုက်ဆန့်ကျင်နေတဲ့ ကိစ္စတချို့လောက်ကိုပဲပြင်ကြမှာလား၊ ဖက်ဒရယ် ပြည်ထောင်စုဖြစ်ပေါ်လာစေမယ့် ဦးတည်ချက်နဲ့ ဖွဲ့စည်းပုံအသစ်ရေးကြမှာလား၊ဆိုတဲ့ ပြဿနာကိုမလွဲမသွေတွေ့ကြရဖို့ ရှိပါတယ်။ ဒီ ပြဿနာက ၁၉၄၈ လွတ်လပ်ရပြီးကတည်းကအနာဟောင်းအနာဆွေးလည်း ဖြစ်နေပါတယ်။ လွတ်လပ်ရေး ရပြီးချိန်က စပြီး မြန်မာနိုင်ငံ ပြည်တွင်းစစ်မီးတောက်လျောက်လောင်ခဲ့တာ၊ နိုင်ငံရေး စစ်ရေး ပဋိပက္ခတွေ အတောမသတ်နိုင် ဖြစ်ပေါ်ခဲ့ရတာဟာ၊အစိုးရ အဆက်အဆက် ပင်လုံ ကတိကဝတ်ကို လစ်လျုရှုထားခဲ့တာကြောင့်လို့ တိုင်းရင်းသားတွေကစွပ်စွဲပါတယ်။ အခု နေက်ဆုံးရေးဆွဲတဲ့၂၀၀၈ ဖွဲ့စည်းပုံအခြေခံ ဥပဒေမှာ လည်း ပြည်နယ်တွေနဲ့အာဏာ ခွဲဝေရာမှာ  ညီမျှမှု မရှိတာကြောင့်ဖြစ်တယ်လို့ယေဘုယျ ကောက်ချက်ချကြတာတွေ့နိုင်ပါတယ်။

ဖက်ဒရယ် ပြည်ထောင်စုတည်ဆောက်ရေး တောင်းဆိုနေတဲ့ကိစ္စက၊ တိုင်းရင်းသားခေါင်းဆောင်တွေနဲ့ ဗမာအမျိုးသား ခေါင်းဆောင်တွေ (အထူးသဖြင့် ဗိုလ်ချုပ်အောင်ဆန်း) တို့ အကြား ကတိပြုထားခဲ့တဲ့သမိုင်းကြောင်း ရှိထားတဲ့ အတွက်  တိုင်းရင်းသားတွေကမြန်မာပြည်ကို ဖက်ဒရယ် ပြည်ထောင်စုအဖြစ် ပြန်လည်ဖွဲ့စည်းရေး တောင်းဆိုနေကြ တာဖြစ်ပါတယ်။

ဒီနေရာမှာ ပင်လုံစာချုပ်နဲ့ပတ်သက်လို့ အင်္ဂလိပ်တို့ကတောင် အတော်အံ့အားသင့်ခဲ့ကြတဲ့အချက်ကိုလည်း ဒီကနေ့ မြန်မာ ခေါင်းဆောင်တွေမေ့မေ့လျော့လျော့ မဖြစ်သင့်ဘူးထင်ပါတယ်။ ဒီတုံးက တိုင်းရင်းသားခေါင်းဆောင်တွေသာ လက်မှတ်မထိုးခဲ့ရင် တောင်ပေါ်နဲ့ မြေပြန့်ဟာ ကွဲသွားနိုင်ပါတယ်။ တောင်တန်းနဲ့ပြည်မ ပင်လုံစာချုပ်အရပူးပေါင်းပြီး လွတ်လပ်ရေး ယူချင် တာဟာ တိုင်းရင်းသားတွေရဲ့ ဆန္ဒသဘောထားအမှန်ဟုတ်မဟုတ် ဗြိတိသျှအစိုးရက စုံစမ်းရေးကော်မရှင်ဖွဲ့ပြီးတောင် စုံစမ်း ခဲ့ရတဲ့ကိစ္စဖြစ်ပါတယ်။မြန်မာသမိုင်းကို ပြန်ကြည့်ရင် “ရီးစ်ဝီလျံကော်မရှင်” (Rees-Williams Commission) ဆိုတာတွေ့နိုင် ပါတယ်။  ဒီကော်မရှင်က  ဗမာတွေနဲ့အတူ လွတ်လပ်ရေး ယူချင်တာ တိုင်းရင်းသားတွေရဲ့ဆန္ဒသဘောထားအမှန်ဟုတ် မဟုတ် စုံစမ်းဖို့ပါပဲ။ ကော်မရှင် ဥက္ကဋ္ဌက ဗြိတိသျှလေဘာပါတီပါလီမန်အမတ် Lt.Col.David Rees-Williams ဖြစ်ပါတယ်။ သူ့နာမည် ကို အစွဲပြုပြီး သမိုင်းမှာ“ရီးစ်ဝီလျံကော်မရှင်” လို့ခေါ်ဆိုခဲ့တာဖြစ်ပါတယ်။

၁၉၄၇ ခုနှစ် မတ်လ(၇)ရက်နေ့မှာရီးစ်ဝီလျံ ကော်မရှင် မြန်မာပြည်ကို ရောက်ပါတယ်။ ကော်မရှင်မှာ အင်္ဂလိပ်အရာရှိတွေ အပြင်မြန်မာတို့ဘက်က ဗိုလ်ခင်မောင်ကလေး၊ ဦးတင်ထွဋ်၊သခင်နုတို့ပါဝင်ပြီး၊ တိုင်းရင်းသားတွေဘက်က ကိုယ်စားလှယ် အဖြစ် စောစံကေး၊ စောမြင့်သိန်း၊မိုင်းပွန်စော်ဘွား စ၀်စံထွန်း၊ ဆမားဒူးဝါး ဆင်ဝါးနောင်၊ ဦးဝမ်ကိုဟော တို့ပါဝင်ကြပါ တယ်။ကော်မရှင်ရဲ့ တရားဝင်အမည်က Frontier Areas Committee of Inquiry ဖြစ်ပါတယ်။ ကော်မရှင်ဟာကချင်၊ကယား၊ ကရင်၊ ချင်း၊ ရခိုင် နဲ့ ရှမ်းပြည်နယ်တွေအနှန့် မိုင်ပေါင်း (၂၀၀၀)လောက်ခရီးဆန့်ပြီး၊ တိုင်းရင်းသားအဖွဲ့အစည်းပေါင်းစုံ၊ လူပုဂ္ဂိုလ်ပေါင်းစုံနဲ့ တွေ့ဆုံမေးမြန်းစုံစမ်းခဲ့တယ်။ ၁၉၄၇ ဧပြီ(၂၃)မှာ အစီရင်ခံစာထွက်လာတယ်။ဗမာတွေနဲ့အတူ ပူးတွဲပြီး လွတ်လပ်ရေး ယူချင်တာဟာ တိုင်းရင်းသားတွေရဲ့ ဆန္ဒ သဘောထားအမှန်ဖြစ်တယ်လို့ကော်မရှင်ကဖေါ်ပြခဲ့တယ်။ ၁၉၄၇ မေလ (၂) မှာ ဗြိတိသျှအစိုးရက အစီရင်ခံစာကို အတည်ပြုခဲ့တယ်။ဆိုလိုတာက “ရီးစ်ဝီလျံကော်မရှင်” အစီရင်ခံချက်အရ ဗြိတိသျှ အစိုးရကလည်း ပင်လုံစာချုပ်ကိုအသိအမှတ်ပြုခဲ့တာ သမိုင်းမှာ တွေ့နိုင်တယ်။ ဒီတော့ ပင်လုံစာချုပ်ပါ ကတိက၀တ် တွေနဲ့ပတ်သက်လို့ပေါ့ပေါ့တန်တန်သဘောမထားသင့်ဘူးလို့ ထင်ပါတယ်။ ဒီအချက်ကြောင့်လည်း KIO က နောင်လာမယ့် ငြိမ်းချမ်းရေးဆွေးနွေးပွဲတွေမှာနိုင်ငံတကာ သက်သေအဖြစ် ဗြိတိသျှကိုယ်စားလှယ်ကိုလည်း ထည့်ချင်တာဖြစ်ပါတယ်။

အခု မေလ (၂၈-၂၉-၃၀)အစိုးရနဲ့ ကချင်လွတ်မြောက်ရေးအဖွဲ့တို့ (၈)ကြိမ်မြောက် ပြုလုပ်တဲ့ မြစ်ကြီးနားအစည်းအဝေး မတိုင်ခင် မေလ(၂၂)ရက် နေ့မှာ “ကချင်အမျိုးသားများအတိုင်ပင်ခံအဖွဲ့” က ထုတ်ပြန်ခဲ့တဲ့ကြေညာချက်ဟာ အရေးကြီး ပါတယ်။ “လက်ရှိအစိုးရ ခေါင်းဆောင်တွေအနေဖြင့် ယခင်အစိုးရများနည်းတူပင်လုံ ကတိကဝတ်များကို အလေးဂရုမ ပြုဘဲ ဘေးဖယ် ထားမည် ဆိုပါက ပြည်ထောင်စု တည်တံ့ခိုင်မြဲရေးကိုထိခိုက်လာနိုင်ပြီး ထိုသို့ ဖြစ်လာပါက ကချင်ပြည်သူများ အနေဖြင့်လည်း အနာဂတ် နောင်ရေးအလို့ငှာကိုယ့်ခြေထောက်ပေါ် ရပ်တည်နိုင်ရေး စဉ်းစားဆောင်ရွက် သွားရန် သမိုင်းပေး တာဝန်ရှိ လာတော့မည်” လို့ ထည့်သွင်းဖော်ပြထားတဲ့ အချက်ကို အစိုးရက သတိပြုဖို့လိုပါတယ်။ သမ္မတဦးသိန်းစိန်အစိုးရ အနေနဲ့ တကယ် ရေရှည် ငြိမ်းချမ်းတဲ့ ပြည်ထောင်စုမြန်မာနိုင်ငံကိုထူထောင်ချင်ရင် “ကချင်အမျိုးသားများအတိုင်ပင်ခံအဖွဲ့” ရဲ့ စာကို အလေးအနက် ထည့်သွင်းစဉ်းစားရမှာဖြစ်ပါတယ်။

ဖေဖော်ဝါရီလ ၂ ရက်နေ့ကသမ္မတ ဦးသိန်းစိန်က KIO ထံပေးပို့တဲ့ စာမှာ “တိုင်းရင်းသားများအတွက် ကိုယ်ပိုင်ပြဋ္ဌာန်းခွင့်နှင့် ပတ်သက်၍ စားပွဲပေါ်တွင် တွေ့ဆုံဆွေးနွေး၍ အဖြေရှာခြင်းသာလျှင် တခုတည်းသော နည်းလမ်းဖြစ်ကြောင်း”ဖေါ်ပြချက်ကို “ကချင်အမျိုးသားများအတိုင်ပင်ခံအဖွဲ့” က ကြိုဆိုတဲ့အကြောင်း ဖေါ်ပြထားပါတယ်။ဒီအချက်က ကောင်းတဲ့ အလားအလာ လို့ ဆိုနိုင်ပါတယ်။

ဒီအပြင် “၂၀၁၂ ခုနှစ်ဇန်နဝါရီလ ၁၉ ရက်နေ့က ငြိမ်းချမ်းရေးအဖွဲ့နှင့် KIO တို့ ပဏာမ သဘောတူညီချက်တွင် ထာဝရ တည်တံ့ခိုင်မြဲသော ငြိမ်းချမ်းရေး ဖော်ဆောင်နိုင်ရန် အလို့ငှာ ပင်လုံတွင် ကတိကဝတ် ပြုခဲ့ကြသည့်အမျိုးသား တန်းတူမှုနှင့် တိုင်းရင်းသား ကိုယ့်ကံကြမ္မာ ကိုယ်ဖန်တီးခွင့်များအပေါ် အခြေခံ၍အလေးအနက်ထား ဆွေးနွေးသွား မည်” လို့ထည့်သွင်း ဖေါ်ပြ တာကိုလည်း၊ ဝမ်းသာကြိုဆိုပြီး အမြန်ဆုံးအကောင်အထည်ဖော်လိမ့်မည်ဟု မျှော်လင့်ကြောင်း မေ ၂၂ “ကချင် အမျိုးသားများ အတိုင်ပင်ခံအဖွဲ့”ရဲ့ ကြေညာချက်မှာ ဖော်ပြထားပါတယ်။ ကချင်လူမျိုးတို့ရဲ့ နိုင်ငံရေးရာကိစ္စ ညှိနှိုင်းဆွေးနွေး ဖို့ ဖွဲ့စည်းထားတဲ့ ကချင်အတိုင်ပင်ခံအဖွဲ့မှာ၊ကချင်လူမျိုးပေါင်းစုံ ကိုယ်စားလှယ်တွေနဲ့ ဖွဲ့စည်းထားတယ်လို့ဆိုပါတယ်။

ကချင်အမျိုးသားများအတိုင်ပင်ခံအဖွဲ့ရဲ့လိုလားတောင်းဆိုချက်တွေကို လေ့လာကြည့်တဲ့အခါ၊ အမျိုးသားတန်းတူညီမျှမှု၊ တရားမျှတမှုနှင့်ငြိမ်းချမ်းရေးကိုလိုလားကြောင်း၊ မိမိအမျိုးသားများ၏ နယ်မြေကို မိမိတို့ကိုယ်တိုင်စီမံအုပ်ချုပ်လိုကြောင်း၊ ကိုယ့်ကြမ္မာ ကိုယ်ဖန်တီးခွင့်နှင့် ကိုယ်ပိုင်ပြဋ္ဌာန်းခွင့်အပြည့်အ၀ရရှိလိုကြောင်း၊ စစ်မှန်သော ဖက်ဒရယ်ပြည်ထောင်စု တည်ဆောက်ရန် လိုလားကြောင်းဖေါ်ပြထားတာတွေ့နိုင်ပါတယ်။ အနှစ်ချုပ် အရေးကြီးတဲ့အချက်ကတော့ ကြေညာချက် အပိုဒ်(၅) မှာ- ((သို့ဖြစ်၍ စစ်မှန်သော ဖက်ရယ်ပြည်ထောင်စု တည်ဆောက်နိုင်ရန် နိုင်ငံတော်ဖွဲ့စည်းပုံအခြေခံဥပဒေသစ် ကို အမြန်ဆုံးရေးဆွဲပြဋ္ဌာန်းရန် အလေးအနက်တောင်းဆိုပါသည်။)) လို့ တောင်းဆိုထားတဲ့အချက်ဖြစ်ပါတယ်။

မေလ(၃၀)ရက်မှာတော့ဝန်ကြီးဦးအောင်မင်းနဲ့ ဒုတိယဗိုလ်ချုပ်ကြီးမြင့်စိုး တို့ဦးဆောင်တဲ့ ပြည်ထောင်စုငြိမ်းချမ်းရေး ဖေါ်ဆောင် မှုကော်မတီနဲ့ ဗိုလ်ချုပ် ဂွမ်မော် ဦးဆောင်တဲ့ ကချင် လွတ်မြောက်ရေးအဖွဲ့(KIO)တို့ရဲ့ တတိယမြောက်နေ့ ဆွေးနွေးပွဲကနေ သဘောတူညီမှု (၇) ချက် ရရှိခဲ့တဲ့ သတင်းထွက်ပေါ်လာကြောင်းရေဒီယို အင်တာနက် သတင်းတွေ ထွက်ပေါ်လာပါတယ်။ ဒါကို တစုံတရာ တိုးတက်မှုလို့ ယေဘုယျဆိုနိုင်ပါတယ်။သဘောတူခဲ့တဲ့အချက် (၇)ချက်ကတော့ အစိုးရနဲ့ KIO အကြား နိုင်ငံရေးဆွေးနွေးပွဲ တွေ ဆက်လုပ်သွားဖို့သဘောတူတယ်။ နှစ်ဖက်တပ်တွေ အပစ်အခတ် လျော့ချဖို့သဘောတူတယ်။ တိုက်ပွဲအသစ်တွေထပ်ပြီး မဖြစ်အောင်နှစ်ဖက်ထိန်းသိမ်းဖို့သဘောတူတယ်။ အစိုးရနဲ့KIO နှစ်ဖက်ကိုယ်စားလှယ်တွေပါဝင်တဲ့ ကြီးကြပ်စောင့်ကြည့်ရေးအဖွဲ့ဖွဲ့ဖို့သဘောတူတယ်။ နေရပ်စွန့်ခွာပြောင်းရွှေ့နေထိုင် ခဲ့ကြရတဲ့ စစ်ဘေးရှောင်(IDP) ဒုက္ခသည်တွေ ကိုပြန်လည်နေရာ ချထားစောင့်ရှေက်မှုပေးဖို့ သဘောတူတယ်။ နှစ်ဖက်တပ် တွေ တပ်ပိုင်းဆိုင်ရာနေရာချထားရေး ဆက်လက်ဆောင်ရွက်ဖို့နဲ့ လုပ်ငန်းပိုင်းလိုအပ်ချက်တွေ ညှိနှိုင်းဆောင်ရွက်ရေးအတွက်KIO ကိုယ်စားလှယ်နဲ့အလုပ်အဖွဲ့တဖွဲ့ မြစ်ကြီးနားမှာ ထားရှိဖို့ သဘောတူတယ်။နောင် ကျင်းပမယ့်ဆွေးနွေးပွဲတွေမှာ အခြား လိုအပ်တဲ့အဖွဲ့တွေ လူပုဂ္ဂိုလ်တွေကို ဖိတ်ကြားဖို့သဘောတူ တယ်….စသဖြင့်ဖြစ်ပါတယ်။

ဒီ (၇)ချက်ပါ သဘောတူညီမှုကိုကုလသမဂ္ဂ မြန်မာနိုင်ငံဆိုင်ရာ အထူးသံတမန် မစ္စတာဗီဂျေ နမ်ဘီးယား၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံးဒုတိယတာဝန်ခံ မစ္စတာလူစီတို့အပါအ၀င်ညီညွတ်သော တိုင်းရင်းသားလူမျိုးများ ဖက်ဒရယ် ကောင်စီ (UNFC) ကိုယ်စားလှယ်တွေ ရှေ့မှောက်မှာလက်မှတ်ရေးထိုးကြတယ်လို့ သတင်းတွေ အရသိရပါတယ်။ (UNFC) ကိုယ်စားလှယ်တွေအဖြစ် ဆွေးနွေးပွဲတက်ရောက်တဲ့တိုင်းရင်းသား လက်နက်ကိုင်အဖွဲ့အစည်း ၉ ဖွဲ့ကတော့ ရှမ်းပြည် ပြန်လည်ထူထောင်ရေးကောင်စီ(RCSS)၊ကရင်အမျိုးသားအစည်းအရုံး (KNU)၊ ကရင်နီ အမျိုးသားတိုးတက်ရေးပါတီ (KNPP)၊ ‘၀’ ပြည်သွေးစည်းညီညွတ်ရေးပါတီ(UWSP)၊ ချင်းအမျိုးသားတပ်ဦး(CNF)၊ ပအို့ဝ်အမျိုးသားလွတ်မြောက်ရေးအဖွဲ့ (PNLO)၊ မွန်ပြည်သစ်ပါတီ(NMSP)၊ ရှမ်း ပြည်တိုးတက်ရေးပါတီ (SSPP)၊ အမျိုးသားဒီမိုကရက်တစ် မဟာမိတ်တပ်မတော် (NDAA) တို့ ဖြစ်ပါတယ်။ လက်ရှိ အနေအထားအရ အပစ်အခတ်ရပ်စဲရေးအထိ သဘောတူညီမှုမရရှိသေးပေမယ့်၊KIO ကိုယ်စားလှယ်နဲ့ အလုပ်အဖွဲ့ တဖွဲ့မြစ်ကြီးနားမှာ ထားရှိဖို့သဘောတူထားခြင်း အားဖြင့်ရှေ့ဆက် သွားကြ မယ့် ငြိမ်းချမ်းရေးဆွေးနွေးပွဲတွေ အတွက်တော့ အလားအလာကောင်းတခုလို့ ဆိုနိုင်ပါတယ်။

UNFC အထွေထွေအတွင်းရေးမှူးနိုင်ဟံသာ ၂၀၁၁ ခုနှစ် ဇူလိုင်လထဲမှာ မဇ္ဈိမသတင်းဌာနကို ပြောကြားခဲ့ဖူးတဲ့ သဘောထားကို ဒီနေရာမှာ အလျဉ်းသင့်လို့ဖေါ်ပြလိုပါတယ်။  နိုင်ဟံသာက မြန်မာနိုင်ငံဟာ လူမျိုးပေါင်းစုံနဲ့ဖွဲ့စည်းထားတဲ့ နိုင်ငံဖြစ်တဲ့ အတွက်၊ စစ်မှန်တဲ့ ဖက်ဒရယ်ပြည်ထောင်စုကို တည်ဆောက်ဖို့လိုတယ်လို့ဆိုပါတယ်။လူမျိုးတိုင်း၊ လူမျိုးတိုင်းမှာ အမျိုးသား ကိုယ်ပိုင် ပြဋ္ဌာန်းခွင့်နဲ့ အမျိုးသားတန်းတူရေးတွေရှိဖို့ဆိုရင်တချိန်က ၁၉၄၇ ခုမှာ စတင်ပြီးတော့ အခြေ တည်လာခဲ့တဲ့ ပင်လုံစာချုပ် ပေါ်မှာအခြေခံပြီး အကောင်အထည် ဖော်နိုင်ဖို့လိုကြောင်းပြောခဲ့တာတွေ့ရပါတယ်။

သူ့အမြင်အရ ၂ဝ၁ဝ ရွေးကောက်ပွဲပြီးတဲ့နောက်ပိုင်းဖြစ်ပေါ်လာတဲ့ အစိုးရမှာ အာဏာအားလုံး သူ့လက်ထဲမှာ မရှိကြောင်း  နိုင်ဟံသာက သုံးသပ်ပါတယ်။ စစ်တပ်က သီးခြား၊ လွှတ်တော်ကလည်းသီးခြားလို ဖြစ်နေပြီး၊ အစီအစဉ်တကျ  အာဏာ ခွဲဝေထားတဲ့ပုံစံ ဖြစ်နေတယ်လို့ သူကဆိုတယ်။

“အဲဒီတော့ သူတို့ကတခုခုလုပ်မယ်ဆိုရင်တော့ ကျနော်တို့ အများကြီး စဉ်းစားရတယ်ဗျ။ သူတို့မှာ လုပ်ပိုင်ခွင့်ရှိရဲ့လား၊အားလုံးရဲ့ သဘောတူညီမှုရှိရဲ့လားဆိုတာ အဲဒါ ခက်နေတယ်။ အဲဒီအနေအထားမျိုး ရှိနေတော့ ကျနော်တို့လည်းအစစ အရာရာ ချင့်ချိန်နေရတယ်” လို့ သူကဆိုတယ်။

ပြည်တွင်းငြိမ်းချမ်းရေးတကယ်လိုချင်ရင် သမ္မတနဲ့ စစ်တပ်ကြား အရင်ညှိနှိုင်းရမယ်လို့ နိုင်ဟံသာက ထင်မြင်ယူဆထားတယ်။ အနိမ့်ဆုံး နိုင်ငံရေးပြဿနာကို နိုင်ငံရေးအရ ဖြေရှင်းဖို့ ဆန္ဒရှိဖို့ လိုကြောင်း၊တချို့က နိုင်ငံရေးအရ မဖြေရှင်းလိုပဲ၊ စစ်ရေးနည်းနဲ့ပဲ ဖြေရှင်းချင်ကြောင်း၊ အစိုးရအဖွဲ့ထဲမှာအမြင်မတူရင် ငြိမ်းချမ်းရေးဆွေးနွေးဖို့တော်တော်လေး ခဲယဉ်းမယ်လို့ ထင်ကြောင်း၊ UNFCအထွေထွေအတွင်းရေးမှူး နိုင်ဟံသာက ပြောထားဖူးပါတယ်။

UNFC ရဲ့သဘောထားကိုပြောရာမှာ တကယ် ငြိမ်းချမ်းရေးလိုချင်ရင်၊ အစိုးရဘက်က ထိုးစစ်တွေ လုံးဝရပ်ဖို့လိုတယ်လို့ သူက ဆိုတယ်။ သူတို့ တိုင်းရင်းသားတွေကလည်း ပစ်တာခတ်တာမလုပ်ဘူး။ အဲဒီလို နားလည်မှုယူပြီးတော့မှယာယီ အပစ်အခတ် ရပ်စဲရေးလုပ်နိုင်မယ်။ အဲဒီကာလမှာ နိုင်ငံရေးအရ ဘယ်လို တွေ့ဆုံ ညှိနှိုင်းဖြေရှင်းနိုင်မလဲဆိုတာကိုလည်းတဖက်က နည်းလမ်း ရှာသွားမယ်။ အဲဒီလိုပုံစံနဲ့ဆိုရင် ညှိနှိုင်းလို့ရပါတယ်….လို့ နိုင်ဟံသာကပြောခဲ့ဖူးတယ်။

“ကျနော်တို့အနေနဲ့ကစစ်အစိုးရက ထိုးစစ်ဆင်နေတဲ့ အဓိကအားဖြင့် ကချင်တို့၊ ရှမ်းတို့၊ ကရင်တို့ ဧရိယာ မှာပေါ့ဗျာ။ အဲဒါ အားလုံးကို ရပ်ဆိုင်းပြီးတော့ တပြည်လုံးအပစ်အခတ်ရပ်စဲရေးကို ကြေညာစေချင်တယ်။ ကျနော်တို့ဘက်ကလည်းကျနော်တို့ လိုက်နာမယ်”

“ကျနော်တို့နိုင်ငံမှာကပြည်တွင်းစစ်ဖြစ်နေတာ နှစ်ပေါင်း ၆ဝ ကျော်ပြီ။ ကျနော်တို့ နိုင်ငံက တဖက်က ကြည့်မယ်ဆိုရင်၊ သဘာဝ သယံဇာတတွေက တော်တော်လေးကို ကြွယ်ဝတယ်၊ ပြည့်စုံကောင်းမွန်တယ်။ ဒါပေမဲ့ ပြည်တွင်းစစ်ဖြစ်နေလို့ ကျနော်တို့နိုင်ငံဟာ အဲဒီသဘာဝသယံဇာတတွေရဲ့ အကျိုးကျေးဇူးတွေကိုလည်း မခံစားနိုင်ဘူး။ တဖြည်းဖြည်းချင်းနဲ့ ခေတ်နောက်ကျပြီး ဆင်းရဲမွဲတေနေတယ်။ ပြည်သူလူထုတွေလည်း ဒုက္ခ ဖြစ်နေတယ်”

“ပြည်တွင်းစစ်ကြောင့်တိုင်းရင်းသားတွေ အမျိုးမျိုးနစ်နာနေရသလို ဗမာလူမျိုးတွေလည်း လွတ်လပ်ရေးရဲ့ အခွင့်အရေးကို ခံစားခွင့်မရှိကြဘူးလို့ မြင်တယ်။ ပြည်တွင်းစစ်ဖြစ်နေတဲ့အတွက် ဘယ်လူမျိုးမှာမှ အကျိုးမရှိဘူး။ နိုင်ငံအတွက်လည်း အကျိုးမရှိဘူး။ အဲဒါကို ကျနော်တို့က စစ်ရေးနည်းနဲ့ ထပ်ပြီးရှင်းနေရင်လည်း ပြေလည်နိုင်မှာ မဟုတ်ဘူး။ အဲဒါကြောင့် နိုင်ငံရေးအရ ဖြေရှင်းနိုင်တဲ့နည်းကိုရှာပြီးတော့မှ အမြန် ဖြေရှင်းနိုင်တာက အကောင်းဆုံးပဲ”

UNFC အထွေထွေအတွင်းရေးမှူးနိုင်ဟံသာရဲ့ အမြင်ဟာ လက်နက်ကိုင်တိုင်းရင်းသားအဖွဲ့အစည်းအများစုရဲ့အမြင်ကို စုစည်း ထင်ဟပ်ပြနေတာ တွေ့နိုင်ပါတယ်။ အနှစ်ချုပ်လိုက်ရင် တိုင်းရင်းသားတွေက ဒီနေ့မြန်မာနိုင်ငံတွေ့ကြုံ ရင်ဆိုင်နေရ တဲ့ နိုင်ငံရေး ပြဿနာတွေကို စစ်ရေးနည်းအရဖြေရှင်းတာထက် နိုင်ငံရေးနည်းအရ ဖြေရှင်းစေချင်ကြတာ အထင်အရှားတွေ့ ရမှာဖြစ်တယ်။ သူတို့ကိုင်ထားတဲ့လက်နက်တွေကသူတို့ကိုယ်သူတို့ကာကွယ်ဖို့၊ သူတို့ရပိုင်ခွင့်တွေကို ကာကွယ်ဖို့သာ ဖြစ်ကြောင်းလည်းသူတို့ဘက်က ထပ်ခါတလဲလဲပြောခဲ့ကြပြီးဖြစ်တယ်။ အစိုးရကသာ မလိုအပ်ဘဲ စစ်အင်အားတွေတိုးချဲ့နေတယ်။ နိုင်ငံရေးပြဿနာကိ စစ်ရေးနည်းနဲ့ရှင်းဖို့ ဆန္ဒပြင်းပြနေတယ်လို့တိုင်းရင်းသားတွေက ယူဆကြတယ်။ မလိုလားအပ်တဲ့ စစ်စရိတ်တွေကြောင့်ပဲ သယံဇာတကြွယ်ဝပါလျှက်နဲ့အရှေ့တောင်အာရှဒေသအတွင်းမှာ အဆင်းရဲဆုံးနိုင်ငံ ဖြစ်ခဲ့ရတယ်။ စစ်တိုက်ပြီးအဖြေရှာဖို့ကြိုးစားတာဟာ အချည်းနှီးပဲဆိုတာ နှစ်ပေါင်း(၆၀) သမိုင်း အတွေ့အကြုံတွေအရ သင်္ခန်းစာတွေ လိုတာထက်တောင်ပိုနေပါပြီ။

ဒါကြောင့် မြန်မာနိုင်ငံတကယ်ငြိမ်းချမ်းဖို့၊ အာရှဒေသ စီးပွားရေးကျားတကောင်ဖြစ်လာဖို့ဆိုတာ… လက်ရှိတိုင်းရင်းသားပဋိပက္ခတွေကိုနိုင်ငံရေးနည်းအရ တွေ့ဆုံဆွေးနွေးအဖြေရှာ နိဂုံးသတ်နိုင်မှသာ ဖြစ်နိုင်စရာရှိပါတယ်။ စစ်ရေးနည်းလမ်းနဲ့ ဖြေရှင်းတဲ့နည်းကတော့ လုံးဝစွန့်လွှတ်ချိန်တန်ပါပြီ။ တိုင်းပြည်သယံဇာတတွေတင်မကလူသားအရင်းအမြစ်တွေကိုပါ ပြည်တွင်းစစ်မှာ အလဟဿဖြုန်းတီးပစ်နေတာကိုရပ်မှသာ တိုင်းပြည်ဆင်းရဲတွင်းက လွတ်ပါလိမ့်မယ်။ မြန်မာပြည် ကမ္ဘာ့အလယ် မှာ ထည်ထည်ဝါ၀ါပြန်လည် ခေါင်းထောင်နိုင် ပါလိမ့်မယ်။ ဖေဖော်ဝါရီလ(၂) ရက်နေ့က သမ္မတ ဦးသိန်းစိန်က KIO ထံပေးပို့တဲ့ စာမှာ “တိုင်းရင်းသားများအတွက်ကိုယ်ပိုင်ပြဋ္ဌာန်းခွင့်နှင့် ပတ်သက်၍ စားပွဲပေါ်တွင် တွေ့ဆုံဆွေးနွေး၍ အဖြေရှာခြင်းသာလျှင်တခုတည်းသော နည်းလမ်းဖြစ်ကြောင်း” ဖေါ်ပြချက်ကို အပြောနဲ့ အလုပ်ညီညွတ်စွာ အကောင်အထည်ဖေါ်နိုင်ဖို့အတွက် လွှတ်တော်နဲ့တပ်မတော်ကလည်း လိုက်လျောညီထွေ ကူညီပံ့ပိုးကြဖို့လိုပါလိမ့်မယ်။

သမ္မတ ဦးသိန်းစိန်အစိုးရတဖွဲ့ထဲအားနဲ့ခေတ်မီတိုးတက်တဲ့ဒီမိုရေစီ ဖက်ဒရယ်ပြည်ထောင်စုတရပ်ကို ထူထောင်နိုင်မှာ မဟုတ်ပါ။လွှတ်တော်ရဲ့ဆီလျော်ညီညွတ်တဲ့ ကူညီမှု၊ တပ်မတော်ရဲ့အတိုင်အဖေါက်ညီတဲ့အကာအကွယ်ပေးမှုတွေ မပါဘဲ ခေတ်မီနိုင်ငံ တည်ဆောက်နိုင်ဖို့မမြင်ပါ။ အလားတူစွာတိုင်းရင်းသားညီနောင်များရဲ့ ပူးပေါင်းပါဝင်ကူညီမှုကို ရရှိဖို့ကလည်းတန်းတူအခွင့်အရေးပေးဖို့ အစိုးရနှင့် တပ်မတော်က မတွန့်ဆုတ်သင့်ပါ။

ယနေ့တိုင်းရင်းသားတွေတောင်းဆိုနေတဲ့ နိုင်ငံရေးတန်းတူမှုဆိုသည့်ဖက်ဒရယ်စနစ်ကို မျက်နှာလွှဲထားလျှင် အကျိုးထက် အပြစ်ကများလာဖို့ရှိပါတယ်။ ဒီတော့ ဖက်ဒရယ်ပြည်ထောင်စုတည်ဆောက်ရေးတောင်းဆိုနေတဲ့ ကိစ္စကို ဖွဲ့စည်းပုံအခြေခံ ဥပဒေ ပြင်ဆင်ရေးနှင့်အတူ၊ သုံးသပ် အဖြေရှာဖို့တာဝန်ဟာ ဒီနေ့နိုင်ငံ့ခေါင်းဆောင်များရဲ့ ပခုံးပေါ်ကျရောက်နေပါတယ်။ တိုင်းရင်းသား ခေါင်းဆောင်တွေနဲ့ အမျိုးသားခေါင်းဆောင် ဗိုလ်ချုပ်အောင်ဆန်းတို့အကြားကတိပြုထားခဲ့တဲ့ ပင်လုံစာချုပ် အခြေခံ ဖက်ဒရယ် ပြည်ထောင်စုကိစ္စကိုအစီအစဉ် စနစ်ဇယား အဆင့်လိုက် ချမှတ်ပြီး ယခုကပင်စတင်အချိန်ယူ စဉ်းစားနိုင် မှသာ၊ ဆယ်စုနှစ်တခု အကြာလောက်မှာ မြန်မာနိုင်ငံဟာစီးပွားရေး နိုင်ငံရေးအရ အာရှကျားတကောင် ဖြစ်လာနိုင်မယ်လို့ ထင်မြင်ယူဆမိကြောင်းပါ။။။။။။။


ဇင်လင်း

Envoy  ဂျာနယ်  Vol (4),No (2)  13.6.2013
Envoy  ဂျာနယ်  Vol (4),No (3)  20.6.2013
တို့ တွင် ဖေါ်ပြခဲ့သည့် ဆောင်းပါး။

No comments:

Post a Comment

Related Posts Plugin for WordPress, Blogger...