Wednesday, March 23, 2016

ပြည်သူရဲ့ အဆုံးအဖြတ်

Tin Nyunt's photo.
ဒီနေ့သတင်းတွေထဲမှာ အကြိုက်ဆုံးကတော့ ကျူးဘားနိုင်ငံကို သွားခဲ့တဲ့ အမေရိကန် သမ္မတ အိုဘားမားရဲ့ စကားပဲဗျ။
“ကျူးဘားနိုင်ငံရဲ့ အနာဂတ်ကို ကျူးဘားပြည်သူတွေကသာ ဆုံးဖြတ်ရမယ်”
ဆိုတဲ့စကားကတော့ အလွန်မှန်တဲ့အတွက် ထောက်ခံပါတယ် ။

ကိုယ့်နိုင်ငံ ကိုယ့်လူမျိုးရဲ့ အနာဂတ်ကို အဲဒီနိုင်ငံက ပြည်သူဆိုတာတွေက အဆုံးအဖြတ်ပေးတာ အမှန်ဆုံးပေါ့။ ကျူးဘားနိုင်ငံလို နိုင်ငံငယ်လေးကို လက်နက်ကိုင်လူတစ်စုကပဲ ကွန်မြူနစ်လမ်းစဉ် အမည်ခံ စစ်အာဏာရှင် တွေအနေနဲ့ အုပ်ချုပ်ခဲ့တာ နှစ်ပေါင်းမနည်းတော့ပါဘူး။

တိုင်းပြည်ကို ပြည်သူကပိုင်တယ်။ ကိုယ့်ကြမ္မာ ကိုယ်ဖန်တီးပိုင်ခွင့်ရှိရ မယ်။ ပြည်သူတွေရဲ့ ကြမ္မာကို လက်နက် ကိုင် အုပ်စုတစ်စုက ဖန်တီးစီရင်ပိုင်ခွင့် မရှိဘူး။ လက်နက်ကိုင်အုပ်စုဆိုတာ ပြည်သူ့ ဝန်ထမ်း။ ပြည်သူတွေရဲ့ အစေအပါးတွေ။ ပြည်သူကို ရန်သူလို ဆက်ဆံဖို့ မဟုတ်ဘူး။ ပြည်သူတွေရဲ့ အသက် အိုးအိမ်စည်းစ်ိမ်တွေကို အကာအကွယ်ပေးဖို့ တာဝန်ယူရုံသက်သက်ပဲဖြစ်သင့်တယ်။ ပြည်သူတွေကို စိုးမိုးအုပ်ချုပ် မင်းလုပ်ဖို့ မဟုတ်ဘူးဆိုတာ မီးမောင်းထိုးပြလိုက်တဲ့ စကားလေးဖြစ်လို့ မလွတ်လပ်သေးတဲ့ ပြည်သူတွေအတွက် လွတ်မြောက်စေဖို့ အလင်းတစ်ခုလို့ ယူဆမိပါတယ်။
တစ်ချိန်က ကျူးဘားရဲ့ ခေါင်းဆောင် ကွယ်လွန်သွားတဲ့ ကက်စ်ထရိုက ပြောသွားဖူးပါတယ်။
“သမိုင်းက အဆုံးအဖြတ် ပေးပါလိမ့်မယ်” ဆိုတာ။ အဲဒါ သူ့ရဲ့ တရားခွင်မှာ ပြောကြားခဲ့တဲ့ ထင်ရှားတဲ့ စကား တွေပါ။
နှစ်ပေါင်းများစွာကြာပြီး အမေရိကန် သမ္မတ အိုဘားမား ကျူးဘားပြန်ရောက်လာချိန်မှာ
“ပြည်သူက အဆုံးအဖြတ် ပေးပါလိမ့်မယ်” လို့ပြောသွားတဲ့စကားဟာ အလွန်အဓိပ္ပာယ်ရှိတဲ့ စကားလို့ ပြော နိုင်ပါတယ်။
CNN ရုပ်သံသတင်းမှာ သမ္မတအိုဘားမားနဲ့ မိသားစု လေယာဉ်ပေါ်က ဆင်းလာတာ တွေ့ရတယ်။ မိုးရွာထဲမှာ ကိုယ့်ထီးလေးတွေကိုယ်ဖွင့်ပြီး ဆင်းလာတာပဲဗျ။ သူ့သမီးတွေလည်း ကိုယ့်ထီးကိုယ်ဖွင့်ဆောင်းကြတယ်။ ဘုရားကျောင်း သွားတော့လည်း သမ္မတမိသားစု ကိုယ့်ထီးလေးတွေ ကိုယ်ဆောင်းပြီး ဂုဏ်ယူစရာကောင်းတဲ့ လုပ်ဆောင်မှုတွေကို ပြကြတယ်။
မြန်မာနိုင်ငံမှာလည်း ဒေါ်အောင်ဆန်းစုကြည် လက်ထက်ကစပြီးတော့ ကိုယ့်ထီးကိုယ်ဆောင်းတဲ့ အလေ့အထ တွေ ထွန်းကားလာတဲ့အတွက် ကြိုဆို ဂုဏ်ပြုပါတယ်။ ထီးတော်မိုး၊ ဖိနပ်တော်ကိုင်တွေကို ခန့်ထားပြီး၊ ဆယ်စုနှစ်ပေါင်းများစွာ မြန်မာပြည်မှာ စိုးမိုးစေခဲ့တဲ့ မတန်မရာမှန်းသူတွေ၊ မင်းလောင်း ဘုရင်ရူးတွေ လက်ထဲက မြန်မာနိုင်ငံကြီး လွတ်မြောက်တော့မယ်ဆိုတာလည်း အမှန်ပြောရရင်
“ပြည်သူတွေက အဆုံးအဖြတ်ပေးခဲ့တာပဲ မဟုတ်ပါလား”
၂၃.၃.၂၀၁၆

No comments:

Post a Comment

Related Posts Plugin for WordPress, Blogger...