Wednesday, July 6, 2016

ဖြေသော်မပြေ၊ကမ္ဘာမကြေအမုန်း (မင်းဒင်)

မင်း ဒင်

(၁)
တကယ်တော့ကျုပ်နဲ့ခွေးတွေအကြားမှာဘာရန်ငြိုးရန်စမှမရှိခဲ့ပါဘူး။
ကျုပ်ဟာခွေးမုန်းသူတစ်ယောက်လည်းမဟုတ်ခဲ့ပါဘူး။ဒါပေမဲ့ဗျာ၊
အမျိုးသားရေးနဲ့ယှဉ်ပြီးတိုင်းပြည်နဲ့လူမျိုးအကြောင်းစဉ်းစားလိုက်တိုင်း
၊ခွေးတွေကိုကျုပ်မြင်ပြင်းကပ်တယ်။
ဟုတ်တယ်။အဲဒီခွေးမုန်းတဲ့ဇာတ်လမ်းဟာ၊လွန်ခဲ့တဲ့တဆယ့်နှစ်နှစ်
ကော့သောင်းဘက်ကနေ၊ရနောင်းဖက်ကို၊ကျုပ်ကူးလာခဲ့ စဉ်တုန်းကအစပြုခဲ့တယ်ဆိုပါတော့။

ဟုတ်ပါ့ဗျာ။ကျုပ်ကထိုင်းနယ်စပ်ရနောင်းမြို့ကိုမျက်စိသူငယ်နားသူငယ်နဲ့
ရောက်လာပြီး၊တောင်သွားရမလိုလို၊ မြောက်သွားရမလိုလိုဖြစ်နေတုန်း
၊ရောက်ချင်ရာရောက်ကွာဆိုတဲ့စိတ်ကူးနဲ့၊ခြေဦးနဲ့ဒူးတည့်ရာ
လျှောက်လာလိုက်တာ၊ဘယ်ကဘယ်လိုဘုန်းကြီးကျောင်းထဲကို
ရောက်သွားမှန်းမသိဘူးဗျာ။ကျုပ်စိတ်ထဲပန်းခြံတခုခုပဲလို့ထင်ပြီး
အဲဒီဘုန်းကြီးကျောင်းထဲကိုဝင်သွားမိတာဗျ။အဲဒီဘုန်းကြီးကျောင်းဝင်းကြီးဟာ၊
ဆယ်ဧကကျော်ကျော်လောက်ရှိနိုင်တဲ့ဧရာမကျောင်းကြီးမို့၊နေပူပူကြီးထဲမှာ၊
ဟိုဟိုဒီဒီလျှောက်ကြည့်နေလိုက်တာ၊တနာရီသာသာလောက်ကြာတော့
ကျုပ်ဗိုက်ထဲကတကြုပ်ကြုပ်မြည်လာပါလေရောဗျာ။
ငွေကတော့ပါပါရဲ့။ဒါပေသိထိုင်းစကားကိုတစ်နှစ်သုံးလေးတောင်
မရေတတ်တဲ့အပြင်၊စားစရာသောက်စရာဘယ်နားရှာဝယ်စားရမှန်းမသိတဲ့
ကျုပ်ဟာ၊အလှငါးတွေမွေးထားတဲ့အုတ်ကန်ကြီးနားက၊
သစ်သားကွပ်ပျစ်လေးပေါ်ခနနားနေတုန်း၊ဘုရားပွဲလှည့်နေတဲ့
ခွေးအုပ်စုနဲ့ပက်ပင်းတိုးတော့တာပါပဲဗျာ။
(၂)
ဟုတ်တယ်ဗျ။ကျုပ်နဲ့မလှမ်းမကမ်းမှာအကောင်နှစ်ဆယ်လောက်ရှိမဲ့ေ
ခွေးအုပ်ကြီးတအုပ်၊စားခွက်ပန်းကန်ကိုယ်စီနဲ့ပွဲတော်တည်နေ
လိုက်ကြတာဗျာ။ခွေးစားခွက်တွေကိုလည်းကြည့်ဦး။
ကျုပ်တို့ရွာအလှူတွေမှာသုံးတဲ့၊နိုင်ငံခြားဖြစ်မယ်လမင်းပန်းကန်တွေထက်
အပုံကြီးသစ်လွင်တောက်ပနေသေးဗျာ။ပါးဖြဲနားဖြဲစားလို့ဗိုက်ဝသွားဟန်တူတဲ့
ကိုယ်တော်ချောများက၊ကျုပ်ထိုင်နေတဲ့ကွပ်ပျစ်နားလာပြီး၊သစ်ပင်ရိပ်
ကောင်းကောင်းမှာ၊လျောင်းစက်အနားယူတော်မူကြသေးသဗျ။
ဒင်းတို့ကတော့ကျုပ်ကိုဖုတ်လေတဲ့ငပိရှိလေတယ်လို့တောင်၊စာရင်း
မသွင်းကြပေမဲ့၊ကျုပ်ကတော့ဒင်းတို့ကိုသေသေချာချာစေ့စေ့စပ်စပ်
ကြည့်မိသဗျ။ခွေးမွှေးခွေးတောင်ပြောင်နေတဲ့ခွေးဆွေတော်ရှစ်သောင်း
မျိုးတော်ပေါင်းဇိမ်ကျနေပုံများ၊လူမင်းစည်းစိမ်၊နတ်မင်းစည်းစိမ်တွေကို
ခံစားနေကြသလိုပါပဲဗျာ။တကယ်တော့အဲဒီနေ့ကကျုပ်မြင်တွေ့ခဲ့ရတဲ့
ခွေးတွေဟာ၊ကျုပ်တို့ဇာတိနိုင်ငံမှာမြင်တွေ့နေကျလမ်းဘေး
ခွေးလေခွေးလွင့်အဆင့်ပါပဲ။
မျိုးနွယ်ကသာမမြတ်တာ၊အစားကောင်းတွေနေ့တိုင်း၊စိတ်ကြိုက်လွှေး
နေကြရတာကြောင့်၊သင်းတို့အသွေးအရောင်တောက်ပြောင်တာသိပ်တော့
မဆန်းလှပါဘူး။ကျုပ်ဗိုက်ထဲမှာသာတကြုပ်ကြုပ်မည်နေပေမဲ့၊
သင်းတို့ကတော့ပွဲတော်တည်အပြီး၊ဟိုဟိုဒီဒီလျှောက်တဲ့ကောင်ကလျှောက်၊
အရိပ်ကောင်းကောင်းအောက်မှာလဲလျောင်းရင်း၊ရွှေရောင်အိပ်မက်တွေနဲ့
တမှေးတမောနှပ်တဲ့ကောင်ကနှပ်ပေါ့။တကောင်များဆိုပိုးလိုးပက်လက်
ဇိမ်ခတ်နေလိုက်တာများအသေကောင်လို့တောင်ထင်ရတဲ့ အထိပါပဲ။
အေးဗျာ။ကျုပ်လည်းဒင်းတို့ကိုကြည့်ရင်း၊သြော်..ဒင်းတို့မှာခွေးဖြစ်ရကျိုး
နပ်လေခြင်းဆိုပြီး၊ဒင်းတို့ဗိုက်ကိုပြေးနမ်းရမလိုလိုနဲ့၊ကျုပ်ဘဝမှာ
လူ့အဖြစ်ကိုရကတည်းက၊ပထမဦးဆုံးအကြိမ်အဖြစ်ခွေးတွေကို
မနာလိုစိတ်ဖြစ်မိတော့တာပါပဲ။
(၃)
ရနောင်းမှာကျုပ်တလကျော်လောက်နေပြီး၊ဖူးခက်မြို့ကိုရောက်လာတော့၊
ရနောင်းခွေးတွေခွေးစဉ်မီတယ်ဆိုတာ ဖူးခက်ခွေးကိုဘယ်မီပါ့မတုန်းဗျာ။
ကျုပ်မှာရှိစုမဲ့ငွေလေးနဲ့(Avenza)ကားလေးတစီးဝယ်ပြီး၊ဖူးခက်မြို့အနှံ့
ပတ်မိချိန်မှာတော့၊ကိုယ်တော်ချောများဟာ၊ဈေးကြီးပေ့၊ကောင်းပေ့ခန့်ပေ့
ဆိုတဲ့မာစီးဒီးဘင့်ဇ်၊ဘီအမ်ဒဗလျူတွေလိုကားကောင်းကားသန်
့ကြီးတွေရဲ့နောက်မှာဇိမ်နဲ့လိုက်ပါရင်း၊ကျုပ်ကိုလျှာထုတ်ပြီးပြောင်ပြ
နေကြလေရဲ့။စုံလိုက်တဲ့ခွေးမျိုး၊ဒိုဘာမင်တဲ့၊ဘောက်ဆာတဲ့
၊ရော့ရှိုင်းယားတယ်ရီယာတဲ့၊ပါ့ဂ်တဲ့။
ဖူးခက်မြို့မှာရှိတဲ့ထိပ်တန်းကုန်တိုက်ကြီးတွေကို၊ကျုပ်စမ်းတဝါးဝါး
လျှောက်သွားရင်း၊တွေ့မိမြင်မိတဲ့ခွေးအစားအစာတွေကလည်း၊
အဆင့်မြင့်ပါဗျာ။ခွေးစာထည့်တဲ့အိတ်တွေများထုတ်ပိုးပုံကောင်းလွန်းလို့
ကျုပ်ဖြင့်လူစာနဲ့မှားပြီး ငါလည်းစားဖို့တစ်အိတ်လောက် ဝယ်ထားဦးမှလို့တောင်၊စိတ်ကူးမိတဲ့အထိ။
အိတ်မှာရေးထားတဲ့စာကိုသေချာဖတ်မိလို့သာပေါ့။အောင်မယ်၊
ကျုပ်ကိုတုံးလှချည့်ရဲ့လို့အပြစ်တင်မစောကြပါလေနဲ့ဦး။
ဆွီဒင်လိုဥရောပနိုင်ငံမျိုးကိုထိုင်းမြန်မာနယ်စပ်ကနေရောက်သွားတဲ့၊
ဒုက္ခသည်တွေတောင်၊ခွေးစာထုတ်ကို(Corn-Flake)လို့ခေါ်တဲ့ပြောင်းဖူးကြိတ်ဖတ် လူစာနဲ့မှား ပြီးနွားနို့ထဲထည့်သောက်ကြဖူးသတဲ့။
ခွေးစာအဆင့်မြင့်တာအသာထားပါဦးလေ။ခွေးတကိုယ်ရည်အသုံးဆောင်
ပစ္စည်းတွေကလည်း၊တကယ့်ကိုအားကျစရာပါပဲဗျာ။ခွေးရေချိုးတဲ့ရှန်ပူ
၊ခွေးအမွှေးလိမ်းတဲ့ခွေးရေမွှေး၊ခွေးသွားတိုက်တံ၊ခွေးနားရွက်အတွင်းပိုင်းကို
သန့်ရှင်းရေးလုပ်ပေးတဲ့ဂွမ်းလိပ်လေးပါတဲ့တုတ်တံ၊ခွေးသုံးပေါင်ဒါ၊
အိုး…၊စုံလို့ပါပဲဗျာ။
ဒါတင်ဘယ်ကပါဦးပါမလဲ။ခွေးအမျိုးကောင်းသားများတနိုင်ငံနဲ့တနိုင်ငံ
ကူးတဲ့အခါ၊အသက်အာမခံတို့၊ကျန်းမာရေးစောင့်ရှောက်မှုတို့ရှိသေးတဲ့
အပြင်၊ခွေးများတင့်တောင့်တင့်တယ်အိမ်ထောင်ရက်သားကျနိုင်ဖို့
ခွေးအောင်သွယ်တော်လုပ်ငန်းနဲ့၊ခွေးတွေဘဝအမောပြေစေဖို့
ခွေးဖက်ရှင်ရှိုး၊ခွေးအလှပြပွဲတွေလည်းရှိသေးသတဲ့ဗျာ။
(၄)
ဒါကလည်းအကင်းပဲရှိပါသေးတယ်ဗျာ။ဖူးခက်၊ကျောက်ဖားအရပ်မှာရှိတဲ့
ရာမမင်းပန်းခြံကြီးထဲကိုညနေတိုင်း၊ကျုပ်လမ်းလျှောက်ထွက်တော့၊
ပန်းခြံမှာတွင်ကျယ်နေတာမောင်မင်းကြီးသားများပါပဲဗျာ။
အမယ်၊ခွေးဆိုလို့အထင်မသေးလိုက်လေနဲ့။ဒင်းတို့ကအားကစား
ဝတ်စုံတွေနဲ့ကျော့လို့မော့လို့။ခွေးဝတ်တယ်ဆိုလို့လည်းလျှော့မတွက်
လိုက်လေနဲ့နော်။(Addidas),(Nike),(Puma)တို့လို တကဲ့ထိပ်တန်းဘရင်းဒက်၊ဝတ်စုံတွေခင်ဗျ။ကျောနံပတ်တွေနဲ့အပြင်၊
နာမည်တွေပါပါလိုက်သေး။ဘာတဲ့၊မက်ဆီ၊ဆွာရက်ဇ်၊စီရော်နယ်ဒို
၊နေမာ၊ဘေးလ်..၊ကမ္ဘာကျော်ဘောလုံးသမားစုံလို့ပါပဲဗျား။
အဲဒီပန်းခြံထဲမှာမြန်မာရွေ့ပြောင်းအလုပ်သမားလေးငါးယောက်လည်း
တွေ့ပါ့ဗျာ။အားကစားလေ့ကျင့်ခန်းလာလုပ်တယ်တော့
မထင်လိုက်ပါနဲ့။ခွေးလာကျောင်းကြတာတဲ့ဗျာ။အမျိုးကောင်းခွေးများ၊
အိမ်မှာအနေများရင်အညောင်းမိတော်မူမှာစိုးလို့၊ခွေးတွေကိုပန်းခြံထဲမှာ
လမ်းလျှောက်ချိန်ပေးရသတဲ့။ခွေးကျောင်းတဲ့သူတွေက၊ဖိုင်ဘာပြား အဝိုင်းလေးကိုခပ်ဝေးဝေးလွှင့်ပစ်လိုက်၊ခွေးကလိုက်ကောက်လိုက်
၊ခွေးကျောင်းတဲ့သူတွေကခွေးနဲ့အတူပြေးလိုက်ပေါ့။
အဲ..၊အဲဒီကိုရွှေခွေးများမစင်စွန့်တော်မူကြတော့မယ်ဆိုရင်တော့ခွေးကျောင်း
သမားများက၊ခွေးဖင်ဝမှာ၊တစ်ရှူးစက္ကူ ထူထူခံပြီး၊သန့်စင်ပေးရပါသဗျာ။
ကျုပ်ဟာဟိုပဝေဘဝများစွာကခွေးတွေနဲ့ပါရမီရေစက်ရှိတယ်ထင်ပါရဲ့။
ဖူးခက်ရောက်စတုန်းက၊စီးပွားရေး၊လူမှုရေးကအစ၊တိုင်ပင်ဖော်တိုင်ပင်ဖက်၊ မစ္စတာဝူးဆိုတဲ့
ဂျပန်ကပြားကလည်းခွေးချစ်သူစာရင်းမှာထိပ်ဆုံးကပါသဗျာ။
သူ့ကိုအကြောင်းပြုပြီးသကာလ၊သူ့ခွေးတွေအမွှေးညှပ်တဲ့ဆိုင်၊သူ့ခွေးတွေ
နေမကောင်းရင်ခွေးအတွင်းလူနာအဖြစ်တင်ထားလို့ရတဲ့အဆင့်မြင့်
ခွေးဆေးရုံ၊ခွေးခြေသည်းလက်သည်းညှပ်တဲ့ဆိုင်၊ရောက်လိုက်သမျှ
စုံစေ့နေရောဆိုပါတော့။
ဒါအပြင်သူကကျုပ်ကိုစီးပွားရေးလုပ်ငန်းတခုအတွက်ရှယ်ယာခေါ်တော့လည်း၊
လူပါစားနိုင်တဲ့အဆင့်မြင့်ခွေးစာထုတ်လုပ်မဲ့စက်ရုံတဲ့။ကျုပ်ကမြန်မာပြည်ဘက်ကနေ၊
ငါးမဲလုံးကုန်ကြမ်းတွေဝယ်ပေးရမှာတဲ့။
(၅)
ခွေးဇာတ်ကိုအစုံအစေ့သာခင်းရရင်၊ခွေးဋီကာဆယ်တွဲလောက်တောင်
ရှိမယ်ထင်ပါရဲ့။ဂျပန်နိုင်ငံယိုကိုဟားမား မှာနေတဲ့၊ ကျုပ်မိတ်ဆွေဂျပန် စီးပွားရေးသမားတယောက်ကလည်း၊ထိုင်းကခွေးအသုံးအဆောင်တွေ၊
ဂျပန်ကို သွင်းချင်ပြန်သတဲ့။ကျုပ်ဆီကိုအီးမေးလဲထဲကနေ၊ သူပို့လိုက်တဲ့ခွေးဇိမ်ခံပစ္စည်းတွေကိုကြည့်ပြီး၊ကျုပ်ဖြင့် အံ့အား သင့်လွန်းလို့ကိုယ့်နဖူးကို၊ကိုယ့်လက်နဲ့ဖြန်းကနဲနေအောင်ရိုက်မိတဲ့အထိပါပဲ။
ခွေးအိမ်၊ခွေးပုခက်၊ခွေးမွေ့ယာ၊ခွေးခေါင်းအုံး၊ဒီဇိုင်းတွေကဆန်းပြားလွန်း
တာကြောင့်၊သြော်..၊ခွေးဖြစ်ချင်စိတ်တောင်ပေါက်တဲ့အထိပါပဲဗျာ။အေးပေါ့ဗျာ။
။နိုင်ငံတကာခွေးတွေရဲ့နေစရာအိမ်၊ပရိဘောဂအစရှိသည်တွေဟာ၊
ကျုပ်လိုလူတောင်လိုက်မမီပေမဲ့၊ဖူးခက်မှာရှိတဲ့ကျုပ်တို့မြန်မာအလုပ်သမား
လူသားစစ်စစ်များကတော့၊မဒမတိုင်ထူ၊သွပ် ပြားမိုး၊သွပ်ပြားကာထားတဲ့၊
ဆယ်ပေဝန်းကျင်အကျဉ်းလေးတွေထဲမှာ၊မျက်နှာငယ်နေကြရရှာလေရဲ့။
သူတို့ခမျာ၊ခွေးတွေလောက်တောင်ခွေးစဉ်မမီဘူး။လုံလောက်တဲ့ဆေးဝါး
ကုသမှုမရှိဘူး။ခွေးတွေလိုဘေးအန္တရာယ်ကင်းရှင်းတဲ့အစားအသောက်တွေကိုစားခွင့်မရဘူး။
 ခွေးတွေနေသလို၊ လူချင်းတူတူ၊ သူချင်းမျှမျှအဆင့်အတန်းမီမီ
မနေနိုင်ကြဘူး။ခွေးတွေလောက်တောင်အကြောက်တရားကင်းကင်းနဲ့
မနေရဘူး။
(၆)
အဲဒါကြောင့်ကျုပ်ပြောတာပေါ့။ခွေးနဲ့ကျုပ်အကြားမှာဘာရန်ငြိုးရန်စမှ
မရှိခဲ့ပေမဲ့၊အမျိုးသားရေးနဲ့ယှဉ်ပြီး၊တိုင်းပြည်နဲ့လူမျိုးအကြောင်းစဉ်းစားမိရင်
၊ခွေးတွေကိုကျုပ်ရွံရှာမုန်းတီးတာအမှန်ပါပဲ။
တကယ်တော့အဲဒီခွေးတွေဟာ သူတို့သခင်၊လူချမ်းသာတွေအားကိုးနဲ့ လူထက်သာအောင်အရာဝင်နေကြတာပါဗျာ။
ခင်ဗျားသေချာစဉ်းစားကြည့်လေ။အဲဒီထိုင်းသူဌေးထိုင်းလူချမ်းသာတွေဟာ၊
ကမ္ဘာကျော်ခရီးသွားမြို့ကြီးဖြစ်တဲ့ဖူးခက်မှာခေတ်မီဟိုတယ်ကြီးတွေ၊
အပန်းဖြေစရာနေရာတွေ၊စားသောက်ဆိုင်ကြီးငယ်တွေ၊ကုန်တိုက်ကြီးတွေ
ကိုပိုင်ကြတယ်။ကျုပ်တို့မဟာမြန်မာများကတော့၊အဲဒီလုပ်ငန်းယန္တယားကြီးကို
မပြတ်လည်နိုင်စေဖို့၊ဘယ်ထိုင်းနိုင်ငံသားမှလုပ်ချင်စိတ်မရှိတဲ့ စားပွဲထိုး၊ပန်းကန်ဆေး၊သန့်ရှင်းရေးဆိုတဲ့အလုပ်မျိုးတွေကို
လုပ်နေကြရရှာသဗျာ။
ထိုင်းကိုရောက်နေတဲ့ကျုပ်တို့မြန်မာတွေရဲ့ဘဝဟာ၊ဘယ်လောက်များ
ဆိုးရွားသလဲဆိုရင်၊ထိုင်းသူဌေးတယောက်ရဲ့ခွေးက၊လိုက်ဟောင်ပြီး
ကိုက်မလိုလိုလုပ်လို့၊ခဲနဲ့ပြန်ပစ်မိတဲ့၊ကျုပ်တို့မြန်မာလူမျိုးတယောက်၊
ထိုင်းသူဌေးရဲ့ သေ နတ်စာမိပြီး၊ပွဲချင်းပြီးခဲ့ဖူးပါရောလားဗျာ။ တိုတိုပြောရရင်၊ခွေးဘဝနဲ့လူ၊လူဘဝနဲ့ခွေးတွေဖြစ်ကုန်ကြပြီဆိုပါတော့ ဗျာ။
ဒီတော့၊တဝမ်းတခါးအတွက်ဇာတိနိုင်ငံကိုစွန့်ခွာပြီး၊သူတပါးနိုင်ငံမှာ
၊ခွေးလောက်တောင်အဆင့်မမီတဲ့ဘဝမျိုးနဲ့ နေကြရတာကို၊နိစ္စဓူဝတွေ့မြင်
နေရတဲ့ကျုပ်ဟာ၊ခွေးတွေကိုမုန်းတာဆန်းသလားဗျာ။
ဒါကြောင့်ကျုပ်ဟာသခင်အားကိုးနဲ့ခွေးဝါးဝနေတဲ့ခွေးတွေကိုမုန်းတယ်။
ကျုပ်တို့မြန်မာတမျိုးသားလုံးရဲ့ဂုတ်သွေးကိုစုပ်ပြီး၊မတရားတဲ့
နည်းလမ်းနဲ့ကြီးပွားချမ်းသာနေကြသူတွေကိုမုန်းတယ်။
သူတို့နဲ့၊တနည်းမဟုတ်တနည်းပတ်သက်နေတဲ့၊အခွင့်အထူးခံနေတဲ့
ခွေးမှန်သမျှကိုကျုပ်မုန်းတယ်။ခွေးစိတ်ပေါက်နေတဲ့သူတွေကိုလည်း
မုန်းတယ်။သခင်အားရကျွန်ဝါးဝပြီးခွေးကျင့်ခွေးကြံကြံနေကြတဲ့သူတွေကို
မုန်းတယ်။လူယောင်ဆောင်တဲ့ခွေးတွေကိုမုန်းတယ်။
ခွေးတွေနဲ့ကျုပ်အကြားမှာ၊မေတ္တာကမ္ဘာခြားတယ်။သူတို့ကတဖက်၊
ကျုပ်ကတဖက်ရန်ငါစည်းပြတ်တယ်။ကျုပ်အခုရေးပြနေတဲ့စာတွေကို
ခွေးတွေသာဖတ်မိရင်၊အုပ်စုဖွဲ့ပြီးကျုပ်ကိုဝိုင်းကိုက်ကြမှာသေချာတယ်။
ဒါပေမဲ့ဘယ်ခွေးကိုမှကျုပ်လူစာရင်းမသွင်းဘူး။ခွေးတွေဘယ်လောက်စည်းလုံး၊
စည်းလုံး၊ကျုပ်ဂရုမစိုက်ဘူး။ကျုပ်ဟာခွေးနဲ့ဖက်ကိုက်နေတဲ့ကောင်လို့
ပြောချင်ပြောကြပါစေတော့။
ကျုပ်ထိုက်နဲ့ကျုပ်ကံပဲလို့သာမှတ်ပါတယ်။

၅ ဇူလိုင် ၂၀၁၆ နေ့ထုတ် သည်ဗွိုက်ဒေးလီးစ်သတင်းစာမှ။ ။
သရုပ်ဖော်။ ။သီဟမောင်မောင်၊

No comments:

Post a Comment

Related Posts Plugin for WordPress, Blogger...